मुख्यमंत्री विष्णुदेव साय के मार्गदर्शन में जिला के तीन ठन जगह में सामूहिक बिहाव संपन्न

मुख्यमंत्री कन्या विवाह योजना के तहत 62 जोड़ा ह लीन सात फेरा, नवदंपत्ति ला मिलीस सरकारी मदद

रायपुर, मुख्यमंत्री विष्णुदेव साय के मार्गदर्शन अउ महिला एवं बाल विकास मंत्री लक्ष्मी राजवाड़े के निर्देश के मुताबिक रायपुर जिला में ‘मुख्यमंत्री कन्या विवाह योजना’ के तहत आज तीन अलग-अलग जगह में सामूहिक बिहाव कार्यक्रम गरब के संग पूरा होइस। कुल 62 जोड़ा ह वैदिक मंत्र अउ पारंपरिक रीति-रिवाज के संग अपन नवा जिंदगी के सुरूआत करिन।

टाऊन हॉल, आरंग में 16 जोड़ा के बिहाव कौशल विकास, तकनीकी शिक्षा एवं रोजगार, अनुसूचित जाति विकास विभाग मंत्री गुरू खुशवंत साहेब के मुख्य आतिथ्य में संपन्न होइस। ए मौका में नगर पालिका अध्यक्ष डॉ. संदीप जैन, जनपद अध्यक्ष टाकेश्वरी मुरली साहू, जनपद सदस्य पद्मिनी साहू अउ जनपद उपाध्यक्ष रविन्द्र चंद्राकर उपस्थित रहिन।

डॉ. भीमराव अंबेडकर भवन, सासाहोली, तिल्दा-नेवरा में 31 जोड़ा के बिहाव जिला पंचायत अध्यक्ष नवीन अग्रवाल, जनपद पंचायत अध्यक्ष टीकेश्वर मनहरे, नगर पालिका अध्यक्ष चंद्रकला वर्मा, जिला पंचायत सदस्य अउ महिला एवं बाल विकास सभापति शैल महेन्द्र साहू, जनपद सदस्य अउ महिला एवं बाल विकास सभापति सरोज मुकेश भारद्वाज, नगर पालिका उपाध्यक्ष पलक सुखवानी अउ तिल्दा के सबो पार्षद मन के मौजूदगी में कराए गिस।

मंगल भवन, धरसीवां में 15 जोड़ा के बिहाव जिला पंचायत सदस्य सरोज चंद्रवंशी अउ जनपद अध्यक्ष शकुंतला सेन के गरिमामयी उपस्थिति में संपन्न होइस।

सरकार कोति ले सबो नवविवाहित जोड़ा ला योजना के तहत तय करे गे सहायता राशि दीन गिस। कार्यक्रम में आय अतिथी मन ह नवदंपत्ति ला सुखमय अउ समृद्ध वैवाहिक जीवन बर सुभकामना दीन।

महिला एवं बाल विकास मंत्री लक्ष्मी राजवाड़े ह कहिन कि बेटी के सम्मान अउ सशक्तिकरण राज्य सरकार के पहिली प्राथमिकता आय। मुख्यमंत्री कन्या विवाह योजना ले गरीब परिवार ला सहारा मिलत हे अउ सामाजिक भाईचारा ला बढ़ावा मिलत हे।

ए बखत विभाग के अधिकारी-कर्मचारी, जनप्रतिनिधि अउ भारी संख्या में आम लोगन मन उपस्थित रहिन।