1.05 लाख युवा मन के खाता म आही 32 करोड़ रुपिया, 31 मई के सीएम बघेल जारी करही बेरोजगारी भत्ता के राशि

JayJoharNews. राज्य सरकार के बेरोजगारी भत्ता योजना (Unemployment Allowance Scheme) कोती ले प्रदेश के एक लाख ले ज्यादा युवा मन के बैंक खाता म 31 मई के 32 करोड़ 35 लाख 25 हजार रुपिया के राशि डारे जाही। ए महीना कुल 24 हजार 15 युवा मन ए स्कीम ले अऊ जुड़े हे, जेखर आवेदन ल स्वीकृत करे गे हे। पाछू के बेरा म बेरोजगारी भत्ता के पहिली किस्त के रूप म 66 हजार 185 युवा मन ल 16 करोड़ 54 लाख 62 हजार 500 रुपिया के राशि अंतरित करे गे रिहिस। ए बार एमल ल दूसर किस्त के राशि दे जात हे। एला मिला के एक लाख 5 हजार 395 युवा मन के खाता म 48 करोड़ 89 लाख 87 हजार 500 रुपिया के राशि अंतरित हो जाही।

जेन युवा मन के खाता म राशि अंतरित करे जाना हे ओमा महिला मन के संख्या 64 हजार 25 हाबे उहें कुल युवा मन के संख्या के 39 प्रतिशत हे। अईसने एक लाख 509 पुरुष हे जे ह कुल युवा मन के 61 प्रतिशत हे। शहरी युवा 27 हजार 970 जेन कुल युवा मन के संख्या के 17 प्रतिशत हे। उहें ग्रामीण युवा मन के संख्या एक लाख 36 हजार 564 हे, जे ह कुल युवा मन के संख्या के 83 प्रतिशत हे।

680 प्रकरण ह अपील बर

रोजगार विभाग के अधिकारी मन के मुताबिक बेरोजगारी भत्ता बर आवेदन के नियम के तहत पात्रता जांच होवत हे। जेन मामला म भत्ता स्वीकृत नई करे गे हे ओमन ल अपील के अधिकार दे गे हे। 1680 प्रकरण अपील बर कलेक्टर मन तीर प्रस्तुत करे गे हे। एमे ले 187 प्रकरण म भत्ता स्वीकृत कर ले गे हे। 493 प्रकरण अस्वीकृत अऊ 1001 प्रकरण लंबित हे। पोर्टल म घलो आनलाइन शिकायत करे के बेवस्था दे गे हे।  एमे घलो 2942 शिकायत मिले हे। जेखर 1425 शिकायत ल निराकृत कर दे गे हे उहें बाकी बचे प्रकरण म निराकरण के कार्रवाई करे जात हे।

1701 युवाओं का प्रशिक्षण भी प्रारंभ

बेरोजगारी भत्ता बर आवेदन भरे के संगे-संग बेरोजगार युवा मन के प्रशिक्षण के घलो विकल्प दे जात हे, ताकि ओमन ल नौकरी या फेर व्यवसाय बर प्रशिक्षण दे जा सके। अब तक 1701 युवा मन के प्रशिक्षण आरंभ हो गे हे। लाइवलीहुड कालेज के संगे-संग 33 संस्थान मन म प्रशिक्षण के ब्यवस्था करे गे हे।