बीजेपी के नवा प्रदेश कार्यालय म वास्तुदोष..पार्टी नेता मन बनाइस दूरी

रायपुर.छत्तीसगढ़ म लोकसभा चुनाव के तइयारी जोर-सोर ले चलत हे. लेकिन राजधानी म बीजेपी के नवां प्रदेस कार्यालय बिल्कुल सूना हे. वास्तुदोष अउ शुभ-अशुभ के फेर म पड़ के बीजेपी पुराना दफ्तर ले ही चुनावी गतिविधि मन ल संचालित करत हे. करोड़ों के नवा कार्यालय बूत बन के पार्टी के नेता मन अउ कार्यकर्ता मन के इंतज़ार करत हे.

बछर 2013 के विधानसभा चुनाव के बाद बीजेपी ह राजधानी के डूमरतराई म करोड़ों के लागत ले नवा दफ्तर बनाइस हे.लेकिन कुछु दिक्कत मन आघू आइस त कहे गिस के, दफ्तर के मुख्य द्वार म ही वास्तुदोष हे. फेर ओ दरवाजा ल बंद कर दूसर गेट बनवा दिस. लेकिन फेर दूसर गेट म वास्तुदोष बताय गिस, जेखर बाद अब कार्यालय म आघू ले एंट्री बंद ही कर दे गिस.

विधानसभा चुनाव करीब आए के बाद पार्टी ल अइसे लगत हे के रजबंधा मईदान स्थित एकात्म परिसर बीजेपी बर जियादा लकी हे. लेकिन ये चुनाव म बीजेपी ल 15 बछर के सत्ता खोना पड़िस. अइसे म कयास लगाए जात हे के, लोकसभा चुनाव के संचालन नवा दफ्तर ले हो ही. लेकिन चुनावी शोर के बीच ये दफ्तर सूना हे. कुशाभाऊ ठाकरे परिसर डूमरतराई म बीजेपी के नवा दफ्तर करीब 7 करोड़ के लागत ले बनाय गे हे.

बीजेपी नवा दफ्तर म वाइफाई, मिनी थिएटर, हाईटेक मीटिंग रूम, सभागार, परिसर सीसीटीवी कैमरा मन ले लैस अउ ठहरे बर लक्जरियस कमरा हवय. .येखर ग्राउंड फ्लोर म ग्रामीन जिला के पदाधिकारी, प्रथम तल म शहर जिला के पदाधिकारी अउ सेकेंड फ्लोर म संभागीय स्तर के पदाधिकारी के बैठक मन होत रिहिस हे.

ये तमाम खासियत मन के बावजूद राजधानी के वास्तुशास्त्री पंडित देवनारायण शर्मा के कहिना हे के बीजेपी के नवा भवन म वो तमाम वास्तुदोष हे, जे पुराना कांग्रेस भवन म होत रिहिस हे.

येती बीजेपी कोनो किसम के वास्तुदोष ले इंकार करत हुए केवल कार्यकर्ता मन के सहुलियत के वजह ले एकात्म परिसर ले चुनाव संचालन करे के बात कहत हवय. बीजेपी प्रवक्ता अमित चिमनानी के कहिना हे के कार्यालय सहर म हवय. एखर सबला इहां सहुलियत होवत हे. येखर सेती इहीं ले सबो कार्य संचालित करे जात हे.

उहें बीजेपी के ये कार्यालय अदला-बदली ल लेके कांग्रेस ह बीजेपी उपर चुटकी लीस हे. पीसीसी संचार प्रमुख शैलेष नितिन त्रिवेदी ह कहिना हे के, बीजेपी दूनों कार्यालय के बीच म घूमत हे. बीजेपी के नवा कार्यालय म वास्तु सुधारने के कवायद जारी हवय, लेकिन लोकसभा तक येखर पूरा होए के उम्मीद नई हे . अइसे म पुराना कार्यालय ले ही चुनावी गतिविधियां संचालित हो ही.