बजट म संविलियन के समय सीमा ल दो वर्ष करे जाए ले शिक्षाकर्मी मन म खुशी के लहर

जय जोहार रायपुर…. मुख्यमंत्री भूपेश बघेल ह बतौर वित्त मंत्री अपन दूसर बजट पेश करत शिक्षाकर्मी मन ल बड़े सौगात दे हे। मुख्यमंत्री ह शिक्षाकर्मी मन के शिक्षा विभाग म संविलियन बर समय सीमा ल आठ वर्ष ले घटा के दो साल करे के घोसना कर दिस। एखर ले एक जुलाई ले 16000 शिक्षाकर्मी मन के शिक्षा विभाग म संविलियन करे जाही। ये घोसना ले शिक्षाकर्मी मन म उत्साह हे।

शिक्षाकर्मी विनोद दुबे ह कहिन कि आज मुख्यमंत्री ह विधानसभा म जैसे ही संविलियन के घोसना करिस त पूरा प्रदेश के शिक्षाकर्मी परिवार म खुशी के लहर दौड़ गिस। संविलियन करे जाए के ये फैसला म मैं मुख्यमंत्री के आभार व्यक्त करत हो। जल्द एक प्रतिनिधिमंडल मुख्यमंत्री ले मिलही अऊ धन्यवाद ज्ञापित करही।