गुरसिया म फूल के बरसा ले मुख्यमंत्री के होइस आत्मीय स्वागत

कोरबा । मुख्यमंत्री डॉ. रमन सिंह सोमवा र के विकास यात्रा के बेरा म सूरजपुर जिला के ग्राम उंचडीह ले हेलीकॉप्टर ले कोरबा जिला के ग्राम गुरसिया (पोड़ी-उपरोड़ा) पहुंचिन, जिहां स्वागत सभा म गांव वाले मन ह फूल के बरसा करत उंखर आत्मीय स्वागत करिन। गुरसिया अऊ आस-पास के गांव मन के लइका मन, युवा, बुजुर्ग अऊ महिला मन ह बड़ संख्या म उपस्थित होके मुख्यमंत्री ल सुनिन। डॉ. सिंह ओ मन ल सम्बोधित करत कहिन कि पोड़ी-उपरोड़ा क्षेत्र के जऊन घर अऊ मजरा-टोला म बिजली नइ हे, उहां अवइया चार महीना के भीतर विद्युत सुविधा मिले लगही। ए खातिर अधिकारी मन ल निर्देश दीए गे हे। मुख्यमंत्री ह मनखे मन ल राज्य अउ केन्द्र सरकार के कई ठन योजना मन के जानकारी तको दीन।