ए वजह ले नइ मिल पाइस  छग के  किसान मन ल सम्मान निधी

केंद्र ल भेजी ही नइ गिस किसान मन के  लिस्ट.. भाजपा.

रायपुर : केन्द्र के किसान सम्मान निधी ल लेके छत्तीसगढ़ म जमके राजनीति होवत हे. प्रदेश सरकार इहां के किसान मन के सूची केन्द्र ल नइ भेजे हे. जेखर सेती प्रदेस के लाखों किसान ए योजना ले वंचित हो गिस हे. बीजेपी जिहां एला किसान मन के संग छलावा बतावत हे.  उहें कांग्रेस अपन योजना मन ल बेहतर बतात हुए जानबूझ के कांग्रेस शासित प्रदेस म एखर फायदा नइ पहुंचाए के आरोप लगावत हे.

प्रधानमंत्री किसान सम्मान निधि के पहिली किस्त जारी करे जा चुके हे. लेकिन राज्य सरकार ह किसान मन के सूची नइ भेजे के वजह ले प्रदेस के किसान ए पहिली किस्त ले चूक गेहे. किसान सम्मान निधि योजना लागू करे ले पहिला केन्द्रीय कृषि मंत्रालय ह राज्य सरकार ले अइसे किसान मन के सूची मांगे रहिस हे. जेखर तीर 5 हेक्टेयर ले कम भूमि हे लेकिन छत्तीसगढ़ सरकार ह सूची केन्द्र ल नइ भेजिस. बीजेपी प्रवक्ता सच्चिदानंद उपासने ह एला  किसान मन के संग अन्याय करार दे हे.

एती राज्य सरकार के मानना हे , बीते 2 माह म प्रदेस के 20 लाख किसान मन ल लगभग साढ़े 17 हजार करोड़ के सीधा लाभ प्रदेस सरकार ह दिस हे,  उहें कांग्रेस संचार विभाग प्रमुख शैलेष नितिन त्रिवेदी के कहिना ह, केन्द्र ह जल्दबाजी म ए योजना ल सुरू कर जानबूझ के कांग्रेस सासित प्रदेशस मन दूर रखे हे.