ई-ऑफिस म फाईल बढ़ावत बखत जम्मो नियम अउ साफ राय के साथ होवय प्रस्तुतिकरण: प्रमुख सचिव सोनमणि बोरा

• नवा वित्तीय बछर के कार्ययोजना अउ नवा खरचा प्रस्ताव मन के समीक्षा
• आधार बेस उपस्थिति प्रणाली – पहिली नंबर अवइया मन के सराहना
• बेरा म उपस्थित नई होवइया मन ऊपर होही कार्यवाही

रायपुर. आदिम जाति विकास विभाग के प्रमुख सचिव सोनमणि बोरा के अध्यक्षता म आज नवा रायपुर म स्थित आदिम जाति अनुसंधान अउ प्रशिक्षण संस्थान के सभाकक्ष म पिछला बछर के आय-व्यय अउ नवा वित्तीय बछर के कार्ययोजना के समीक्षा बैठक पूरा होइस।

बैठक म अधिकारी मन ह बताइन कि वित्तीय बछर 2025-26 म विभाग कोति ले कुल बजट के 68 प्रतिशत खरचा करे गे हे। प्रमुख सचिव श्री बोरा ह कहिन कि सरकार कोति ले अलग-अलग योजना मन के बढ़िया संचालन बर जो बजट दिये जाथे, ओकर पूरा लाभ हितग्राही मन ल मिलना चाहिये। एकर बर बछर के सुरु ले ही एक ठो कार्ययोजना बना के ओकर ऊपर अमल करे जाय। ए काम बर जम्मो प्रभारी अधिकारी मन ल आपस म तालमेल बना के तय समय म काम पूरा करना चाहिये। श्री बोरा ह आघू के वित्तीय बछर 2026-27 म खरचा ल 80 प्रतिशत करे के लक्ष्य दीन।

प्रमुख सचिव श्री बोरा ह कहिन कि मुख्यमंत्री विष्णुदेव साय के कुशल नेतृत्व अउ मंत्री रामविचार नेताम के मार्गदर्शन म विभाग ह प्रगति कोति बढ़त हे। विभागीय योजना मन के सफल संचालन ल देखत भारत सरकार ले वित्तीय बछर 2025-26 म ‘धरती आबा जनजातीय ग्राम उत्कर्ष अभियान’ बर 732 करोड़, 21 एकलव्य आदर्श आवासीय विद्यालय मन बर 915 करोड़ अउ अनुच्छेद 275 (1) के तहत 170 करोड़ रुपिया के राशि मिले हे। एहा विभाग बर एक बड़ उपलब्धि आय, जेकर ले आघू के दू बछर म ए सबो काम मन के सफल संचालन ले छत्तीसगढ़ के विकास ल गति मिलही।

बैठक म आदिम जाति विकास विभाग के अलावा आदिम जाति अनुसंधान अउ प्रशिक्षण संस्थान, अनुसूचित जाति विकास विभाग, पिछड़ा वर्ग अउ अल्पसंख्यक विकास अउ छ.ग. राज्य अंत्यावसायी सहकारी वित्त अउ विकास निगम के वित्तीय बछर 2025-26 के आय-व्यय के घलो समीक्षा करे गिस। बैठक म संयुक्त सचिव बी.के.राजपूत, अनुपम त्रिवेदी, वित्त नियंत्रक लाजरूस मिंज, अपर संचालक संजय गौड़, आर.एस.भोई, उपायुक्त गायत्री नेताम, प्रज्ञान सेठ, एल.आर.कुर्रें, विश्वनाथ रेड्डी, मेनका चंद्राकर, कार्यपालन अभियंता त्रिदीप चक्रवर्ती संग अउ आन विभागीय अधिकारी मन उपस्थित रिहिन।

प्रमुख सचिव श्री बोरा ह बैठक म आधार फेस उपस्थिति प्रणाली अउ ई-ऑफिस व्यवस्था के घलो समीक्षा करिन। आधार बेस उपस्थिति प्रणाली म विभाग म सबले जादा उपस्थिति वाले अधिकारी-कर्मचारी मन के सराहना करिन।संगेच ओमन कहिन कि बेरा म नई अवइया मन ऊपर अनुशासनात्मक कार्यवाही करे जाही।

प्रमुख सचिव श्री बोरा ह बैठक म ई-ऑफिस के घलो समीक्षा करत कहिन कि ई-ऑफिस व्यवस्था लागू होय ले प्रशासन म पारदर्शिता अउ कसावट आई हे। संग च ए व्यवस्था ह काम-काज ल मजबूत करे म बहुत उपयोगी साबित होवत हे। ओमन कहिन कि अब ई-ऑफिस म फाईल आये के बाद ले बहुत तेजी ले काम के संचालन संभव होय हे। अधिकारी मन फाईल ल आघू बढ़ावत बखत जम्मो नियम अउ साफ राय (अभिमत) के साथ ही फाईल ल पेश करंय, ताकि ओकर ऊपर आखिरी फैसला लिये जा सके।

ओमन बैठक म वित्तीय बछर 2025-26 अउ 2026-27 के अपरीक्षित नवा खरचा मद प्रस्ताव मन अउ अलग-अलग विकास काम मन के अभी के स्थिति के घलो गहिर समीक्षा करिन। ओमन कहिन कि विभाग कोति ले बिसाए (खरीदे) गे सामान मन के मानकीकरण तय होना चाहिये। ओमन रोज के मजूरी वाले कर्मचारी मन के जिलावार स्थिति, बांटे गे अउ खरचा करे गे राशि के घलो समीक्षा करिन।