धमतरी। हप्ताभर पहिली नगरी के पास सड़क किनारे झाड़ी म मिले रिहिस अज्ञात लाश के गुत्थी ल पुलिस ह सुलझाईन हे। ये मामला म मृतक के पत्नी ह मुख्य आरोपी निकलिस, जेन ह अपन प्रेमी अउ भतीजा संग मिलके अपन पति ल मउत के घाट उतार दिस। पुलिस ह तीनों आरोपी ल गिरफ्तार करिन हे।
हत्या के खुलासा करत एएसपी धमतरी मनीषा ठाकुर रावटे ह बतईन कि 4 सितंबर के नगरी के पास देवपुर के रहवईया राकेश सोनवानी के लाश ह सड़क किनारे झाड़ी म पड़े रहीस अउ उंखर गला म गमछा घलो बंधाय रिहिस। पुलिस ह एक टीम बना के ये मामला के छानबीन करिस त ये पता चलिस कि राकेश सोनवानी के पत्नी सुरूज बाई के डिकेश रात्रे नाम के युवक ले प्रेम संबंध हे अउ दूनों झन राकेश ल रस्ता ले हटाना चाहत रिहिस। एखर बर सुरूज बाई ह अपन पति के हत्या करे के योजना बनईस अउ प्रेमी डिकेश संग अपन भतीजा धनंजय ल घलो साथ दे बर मना लिस। तीन सितंबर के रात म जब राकेश ह शराब के नशा म घर आईस त इही दउरान सुरूज बाई ह अपन प्रेमी ल बुला लिस अउ दूनों झन मिल के गमछा ले राकेश के गला घोंट दिस। एखर बाद धनंजय सोनवानी ह अपन बाइक म डिकेश संग लाश ल लाद के नगरी के पास सड़क किनारे झाड़ी म फेंक के आ गे। पुलिस ह हत्या के आरोप म सुरूज बाई, डिकेश अउ धनंजय ल गिरफ्तार करिन हे।
Other Articles
