मुख्यमंत्री विष्णुदेव साय के पहल ले होनहार लइका मन उठाइन आईपीएल मैच के आनंद

प्रावीण्य सूची (मेरिट) म जगह बनाय वाले विद्यार्थी ला मिलिस अंतरराष्ट्रीय क्रिकेट स्टेडियम म लाइव मैच देखे के मऊका

रायपुर, मुख्यमंत्री विष्णुदेव साय के अगुवाई म राज्य सरकार ह परदेस के होनहार लइका मन ला आगू बढ़ाय अउ ओखर सपना मन ला नवा ताकत दे बर लगातार नवा-नवा काम करत हे। ए रद्दा म आज राजधानी रायपुर म होवत इंडियन प्रीमियर लीग (आईपीएल) मैच के रोमांच ला परदेस के उही होनहार लइका मन महसूस करिन, जेमन दसवीं अउ बारहवीं के मेरिट लिस्ट म अपन जगह बनाके छत्तीसगढ़ के मान बढ़ाय हें।

राज्य सरकार के खास पहल ले परदेस के अलग-अलग जिला ले चुने गे 18 होनहार विद्यार्थी मन नवा रायपुर के शहीद वीर नारायण सिंह अंतरराष्ट्रीय क्रिकेट स्टेडियम पहुँचीन। उहाँ ओमन रॉयल चैलेंजर्स बेंगलुरु अउ मुंबई इंडियंस के बीच होवत जबरदस्त मैच के मजा लिन। मेधावी लइका मन बर ए मऊका सिर्फ क्रिकेट मैच देखे तक नइ रिहिस, बल्कि ए ह ओखर पढ़ाई म नीक प्रदर्शन के सम्मान अउ ओखर आत्मविश्वास ला नवा उड़ान दे के एक प्रेरक कोसिस घलो रिहिस।

मुख्यमंत्री श्री साय के मानना हे कि शिक्षा के क्षेत्र म अब्बड़ नीक काम करे वाले लइका मन ला अइसन मऊका देना चाहिये, जेखर ले ओमन अपन सपना ला अउ बड़े रूप म देखे बर प्रेरित हो सकें। राज्य सरकार ह पढ़ाई, खेल अउ जवान के प्रतिभा ला आगू बढ़ाय बर लगातार संवेदनशीलता के संग काम करत हे।

नवा रायपुर के अंतरराष्ट्रीय क्रिकेट स्टेडियम के भव्यता अउ आईपीएल मैच के रोमांचक माहौल ह लइका मन ला गदगद कर दीस। जादातर लइका मन बर ए ह पहिली मऊका रिहिस, जब ओमन कोनो अंतरराष्ट्रीय स्टेडियम म लाइव मैच देखे बर पहुँचे रिहिन। स्टेडियम के चकाचौंध रोशनी, हजारों दरसक के सोर-हल्ला, खिलाड़ी के जोस अउ पूरा माहौल ह लइका मन बर कोनो सपना ले कम नइ रिहिस। कतको विद्यार्थी मन पहिली बार एतका बड़े खेल आयोजन के हिस्सा बनके अब्बड़ खुस नजर आइन।

हायर सेकेंडरी परीक्षा के मेरिट लिस्ट म पहिली नंबर पाय वाले बलौदाबाजार-भाटापारा जिला के सरस्वती शिशु मंदिर (पलारी) के छात्र जिज्ञासु वर्मा ह कहिस कि ओला बचपन ले क्रिकेट के भारी सोक हे। अब तक ओ ह टीवी म ही आईपीएल देखत रिहिस, लेकिन आज पहिली बार एतका बड़े स्टेडियम म लाइव मैच देखे के मऊका मिलिस हे। ओ ह कहिस कि ए ह ओखर जिनगी के सबले रोमांचक अउ कभू नइ भुलाय वाला पल आय। जिज्ञासु ह मुख्यमंत्री विष्णुदेव साय अउ राज्य सरकार के आभार मानत कहिस कि ए पहल ले ओखर उत्साह अउ आत्मविश्वास ला नवा ताकत मिले हे।

एसी प्रकार ले कांकेर जिला के स्वामी आत्मानंद शासकीय उत्कृष्ट विद्यालय, नरहरपुर के छात्र अउ बारहवीं के मेरिट लिस्ट म दसवां नंबर पाय वाले यश ख्रोबागढ़े ह कहिस कि अंतरराष्ट्रीय खिलाड़ी ला अपन आँखी के आघू खेलत देखे के ओखर बहुते दिन ले इच्छा रिहिस, जे ह आज पूरा होगे। ओ ह कहिस कि स्टेडियम के माहौल, दरसक के जोस अउ खिलाड़ी के प्रदर्शन ह अब्बड़ अद्भुत अनुभव रिहिस। यश ह कहिस कि मुख्यमंत्री श्री साय के ए पहल ह लइका मन के मनोबल ला बढ़ाय वाली अउ ओमन ला आगू बढ़े बर प्रेरणा देवे वाली हे।

विद्यार्थी कहिन कि राज्य सरकार कोति ले अइसन सम्मान अउ बढ़ावा मिले ले ओमन म आगू अउ नीक प्रदर्शन करे के प्रेरणा मिलथे। ओमन कहिन कि ए पहल ह सिर्फ इनाम नोहे, बल्कि ओखर सपना ला पहिचान दे अउ ओमन ला नवा रद्दा देखावे के एक कोसिस आय। कतको लइका मन एला अपन जिनगी के अइसन अनुभव बताइन, जेला ओमन हमेसा याद राखिहीं।

मुख्यमंत्री विष्णुदेव साय के साफ मानना हे कि प्रतिभा ला मऊका अउ सम्मान मिलना जरूरी हे। ओमन कतको मऊका म कहि हें कि परदेस के जवान ही विकसित छत्तीसगढ़ अउ विकसित भारत के सबले मजबूत आधार हें। राज्य सरकार ह पढ़ाई, खेल, तकनीक अउ नवाचार (नवा खोज) के क्षेत्र म युवा मन ला बने मऊका दे बर लगातार काम करत हे, ताकि परदेस के लइका मन राष्ट्रीय अउ अंतरराष्ट्रीय स्तर म अपन पहिचान बना सकें।

राज्य सरकार कोति ले खेल अउ शिक्षा के क्षेत्र म लगातार बने पहल करे जावत हे। डिजिटल शिक्षा, खेल के ढांचा (मैदान-स्टेडियम) के विकास अउ होनहार लइका मन ला बढ़ावा दे जइसन कतको कदम के माध्यम ले लइका मन ला गुणवत्तापूर्ण मऊका दिये जावत हे। आईपीएल मैच के ए अनुभव ला घलो उही दिसा म एक प्रेरक पहल के रूप म देखे जावत हे।

आईपीएल मैच देखे बर पहुँचे लइका मन के चेहरा म उत्साह, खुसी अउ गरब साफ दिखत रिहिस। क्रिकेट बर ओखर लगन अउ पढ़ाई म अब्बड़ नीक प्रदर्शन ला एक संग सम्मानित करे के ए पहल ह निश्चित रूप ले ओमन ला भविष्त म अउ बेहतर करे बर प्रेरित करही। विद्यार्थी ह मुख्यमंत्री विष्णुदेव साय अउ राज्य सरकार के आभार मानत कहिन कि ए अनुभव ह ओखर जिनगी के सबले सुग्घर याद म सामिल रहिही।