महिला स्व-सहायता समूह के बैंक खाता ले निकालिन लाखों रूपिया, पुलिस जुटिन जांच म

सूरजपुर। जिला के रामानुजनगर म भुवनेश्वरपुर के दू महिला स्व-सहायता समूह के खाता ले कोनो ह 6 लाख 36 हजार रूपिया ल निकाल लिस। बैंक म छुट्‌टी रिहिस उहू दिन रूपिया निकाले हे। येला ले के बैंक प्रबंधन ऊपर घलोक आशंका जताए जाथ हे। समूह के महिला मन ह मामला के शिकायत थाना म दर्ज कराए हे।

ग्राम पंचायत भुवनेश्वरपुर के दू ठन महिला स्व-सहायता समूह के सेन्ट्रल बैंक ले स्वीकृत ऋण के राशि 6 लाख 36 हजार रूपिया ल कोनो अज्ञात लोग मन निकाल लिस। हंसवाहिनी महिला स्व-सहायता समूह के सदस्य मन जब सेंट्रल बैंक स्थित अपन बचत खाता ले 65 हजार रूपिया निकाले बर गिन त बैंक वाले मन बतईस कि ये खाता म केवल 1153 रूपिया भर हे।

इसी तरह मधुबन महिला स्व-सहायता समूह के अध्यक्ष अनिता अउ अन्य सदस्य मन ह थाना म शिकायत करे हे कि सेन्ट्रल बैंक के उंखर खाता ले 8 अगस्त के 3 लाख 36 हजार रूपिया अउ 17 अगस्त के 60 हजार रूपिया आहरित कर ले गे हे, जबकि समूह द्वारा राशि आहरित नई करे गे हे। फिलहाल पुलिस ह शिकायत दर्ज कर जांच कर उचित कार्यवाही करे के बात कहिन हे।