घूस लेवत महिला पटवारी रंगे हाथ गिरफ्तार, एसीबी के टीम ह करिन कार्रवाई

बेमेतरा। जिला म एक झन महिला पटवारी ल घूस लेवत एसीबी के टीम ह रंगे हाथ गिरफ्तार  करिन हे। महिला पटवारी ह जमीन के नकल खसरा बी वन के नक्शा बर ग्रामीन ले रिश्वत लेवत रिहिस।

जानकारी के मुताबिक दुकलहा वर्मा ह पारिवारिक आवश्यकता बर अपन ज़मीन ल बेचना चाहत रिहिस। जेकर बर वो ह ज़मीन के अभिलेख ले बर पटवारी आकांक्षा मेमन के पास गिस। महिला पटवारी ह ज़मीन के अभिलेख दे बर उंखर ले दस हजार रूपए के मांग करिस।

जेकर ले परेशान होके वो ह सीधा एसीबी दफ्तर पहुंचके अधिकारी मन से ऐकर शिकायत करिस। शिकायत मिलिस ताहन एसीबी के टीम ह आकांक्षा मेमन ल रिश्वत के किश्त सात हज़ार रूपिया लेवत रंगे हाथ पकड़िन हे। उंहे महिला पटवारी के खिलाफ कार्यवाही जारी हे।