लोरमी। मुंगेली जिला म मध्याह्न भोजन के नाम म भारी भ्रष्टाचार के मामला आघू आइस हे। लोरमी ब्लॉक के रजपालपुर के प्राथमिक स्कूल म महिला समूह ह छात्र मन ल मध्याह्न भोजन त देवत हे, लेकिन सासन के निरधारित मेन्यू के अनदेखी कर के।
सरकार ह मध्याह्न भोजन के जे मेन्यू तय करे हे, ओमा प्रतिदिन अलग-अलग खाना देना हे, लेकिन समूह संचालक के मनमानी के चलत इहां के छात्र मन ल प्रतिदिन सब्जी-चावल देय जात हे। मेन्यू के हिसाब ले अचार, पापड़, मीठा चावल आज तक लइका मन ल नइ देय गिस हे। येखर सिकायत स्कूल के प्रिंसिपल अउ शिक्षक मन ह कई बार अधिकारी मन ले करिन हे। लेकिन समूह के संचालक के मनमानी ल लेके अब तक कोनो कार्रवाई नइ करे गिस हे।
स्कूल के रसोइया ह बताइस के, स्कूल म किचन शेड घलो नइए। संग ही उमन मेन्यू के बारे म जादा जानकारी नइए। संचालक जे सामग्री देवत हे ओकरे से वो ह खाना बना देवत हे। येती समूह के सचिव नीरा अउ संचालक जितेंद्र कुमार कुछु मजबूरी मन के हवाला देवत हुए मेन्यू के आधार म लइका मन ल खाना नइ देय के बात मानिस हे। उहीं लोरमी बीईओ पीताम्बर दास ओगरे ह मामला के सिकायत मिले के बाद कार्रवाई के बात कहत हे।
