खल्लारी के नौजवान मन का किहिन कि मंत्री कवासी लखमा के चेहरा होगे गंभीर, मिलाईन हाथ

महासमुंद। मांदर के थाप म झूमर के नाचे के बाद मंच म बइठे मंत्री कवासी लखमा करा जब खल्लारी के नौजवान मन पहुंचिन अउ एकठ्‌ठा 14 ठन मांग के ज्ञापन सौंपिन अउ किहिन कि हमन अब तक छले गेन, अब आस जागे हे, त लखमा जी के चेहरा म घलो गंभीरता छा गे। नौजवान मन संग हाथ मिलाके मंत्री जी हा जइसे ओमन ला ये भरोसा दीन कि अब तक विकास म पिछवाय खल्लारी क्षेत्र म घलो अब विकास के गंगा बोहाही।

जिला के प्रभारी मंत्री कवासी लखमा जी हा बागबाहरा म आयोजित विश्व आदिवासी दिवस समारोह म मुख्य अतिथि के रूप म पहुंचे रिहिन। खल्लारी क्षेत्र के युवा सामाजिक कार्यकर्ता अउ ब्लॉक कांग्रेस कमेटी के कोषाध्यक्ष तारेश साहू के संग खल्लारी क्षेत्र के नौजवान संगवारी मन ये मौका म खल्लारी क्षेत्र के पीरा मंत्री जी ला बताईन।

ज्ञापन म 14 सूत्री मांग करत बताईन कि जिहां के पहाड़ी म साक्षात खल्लारी माता विराजे हे, जेकर नाम ले ये पूरा विधानसभा क्षेत्र ला नाम मिले हे, वो खल्लारी हा सालों-साल ले उपेक्षा के दुख झेलत हे। विकास बर तरस गे हे। जबकि जंगल, डोंगरी, पहाड़ अउ प्रकृति के सुघ्घर मनोरमा ले भरे ये धार्मिक अउ ऐतिहासिक महत्व के स्थान म पर्यटन विकास के भारी संभावना हे।

लेकिन छत्तीसगढ़ राज्य बने के अतेक साल बाद भी कोई विकास नई कर पाहे। खल्लारी संग छल होवत आत हे। मंत्री जी ला ज्ञापन दवइया मन म कांग्रेस के संयुक्त महामंत्री राहुल कुलदीप, साहित्यिक अउ सांस्कृतिक प्रकोष्ठ के अध्यक्ष निजाम दीवान, खल्लारी युवा कांग्रेस नेता वरूण यादव, केवल यादव, राजू पटेल शामिल रिहिन।

ये करिन मांग:
खल्लारी म महाविद्यालय खोले जाय। देरी नई होना चाही। खल्लारी ला नगर पंचायत के दर्जा मिलय। खल्लारी ला ब्लॉक बनाय जाय। पेयजल समस्या के निदान होना चाही। खल्लारी मातेश्वरी पहाड़ी म रोपवे के संग सीढ़ी म शेड लगाय जाय। ढेकानारा (डेम) तालाब के पाछू ले पहाड़ी म सड़क बनाय जाय।

खल्लारी मातेश्वरी पहाड़ी के तरी ले ढेकानारा (डेम) तालाब के सौंदर्यीकरण अउ जरूरी सुविधा उपलब्ध कराय जाय। चौदहवां शताब्दी म बने ऐतिहासिक जगन्नाथ मंदिर परिसर के सौंदर्यीकरण हो। नेशनल हाईवे क्रमांक 353 ले खल्लारी तक दू किमी सड़क मार्ग के सौंदर्यकरण हो। राजिम अउ सिरपुर के जइसे खल्लारी ला घलो ऐतिहासिक, धार्मिक अउ सांस्कृतिक महत्व के स्थान के रूप म दर्जा मिलय।

खल्लारी के भीमखोज – बोईरगांव नाला म स्टापडेम बनाय जाय, ताकि क्षेत्र म जल के स्तर बढ़य अउ किसान मन ला फायदा होवय। भीमखोज रेलवे स्टेशन के नाम बदल के खल्लारी करे जाय अउ पर्यटन ला बढ़ावा देबर स्टेशन म एक्सप्रेस ट्रेन मन के स्टापेज दिया जाय। नेशनल हाईवे क्रमांक 353 के तीर हंगरी रेस्टोरेंट के पाछू कई साल ले अधूरा परे चांटी बांध के सौन्दर्यकरण के काम ला पूरा कराए जाय।

नेशनल हाईवे क्रमांक 353 स्थित चैतन्य नगर भुंसा पारा के सड़क मार्ग पुल ले भीमखोज रेलवे पुल तक नाला म भी सौन्दर्यकरण के आवश्यकता हे। साथ ही खल्लारी समेत अंचल के लोगन ला रोजगार दिलाए बर क्षेत्र म बड़ पैमाना म औद्योगिक संस्थान स्थापित करे जाय।