परिवार मन अउ पुलिस के बीच म झूमा-झटकी

 .
रायपुर । अपन मन के अधिकार बर आंदोलनरत परिवार ह पुलिस स चकमा देवत हुए सोमवार के दुपहर के अचानक धरना स्थल ईदगाह भाठा मइदान म पहुंच गे। उमन ह पुलिस के ओर ले लगाए गे बैरिगेट तोड़ दि, अउ उहां प्रदर्सन के संग धरना घलो सुरू कर दिन। येखर बाद पुलिस के आला अधिकारी मन म हड़कंप मच गे। इस दउरान पुलिस के परिजन मन ह गृहमंत्री अउ मुख्यमंत्री के खेलाफ जमके नारेबाजी करत रहिन हे। जेला देखत हुए उहां सुरक्षा म तइनात पुलिस कर्मी मन ह प्रदर्सनकारी मन ल खदेड़ना सुरू कर दिन। बाद म पुलिस ह प्रदर्सन करत सबों पुलिस के परिजन मन ल गेरफ्तार करे लगीन। गेरफ्तार प्रदर्सनकारी मन ल पुलिस ह डीडी नगर थाना लेो गिस हे।
छत्तीसगढ़ के पुलिसकर्मी के परिजन मन के लगतार धरना स्थल म पहुंचना जारी हे। प्रदेश के अलग-अलग जिला मन ले पुलिस परिवार के लोगन अउ ये आंदोलन म सामिल होय अउ समर्थन करइया पहुंचत हे।
प्रदर्शनकारी मन म बड़ संख्या म महिला मन अउ लइका सामिल हे। पुलिस ह उमन ल रोके के कोसिस करिन, जेखर ले चलत स्थिति तनावपूर्ण होगे। परिवार मन अउ पुलिस के बीच म झूमा-झटकी घलो होइस, येकर सेती पुलिस ह सख्त रुक अपनात हुए खदेड़िस, जब वो मानने बर तइयार नइ होइन त समझाइस घलो फेर उमन ल गेरफ्तार करे गिस हे। प्रदर्शनकारी मन के कहिना हे के वो अपन मांग मन ल लेके प्रदर्सन करत हवय, येकर बावजूद उमन के सांतिपूर्ण प्रदर्सन ल दबाये के प्रयास करे जात हे। गेरफ्तारी के बाद परिजन मन ह सरकार ल तानशाह बतात हुए कहिन के जब बड़ अधिकारी मन के मांग पूरा हो सकत हे, त हमार काबर नइ होसकय।