रायपुर। छत्तीसगढ़ के स्वच्छता दूत कुंवर बाई के रायपुर के अंबेडकर अस्पताल म शुक्रवार के निधन हो गे। कुंवर बाई 106 बछर के रहिल हे। मुख्यमंत्री डॉ. रमन सिंह ह राज्य के प्रसिद्ध स्वच्छता दूत कुंवर बाई के निधन म गहरा दु:ख व्यक्त करिस हे। धमतरी निवासी कुवंर बाई ह बरस 2016 म अपन बकरी ल बेच के शौचालय बनाके देश ल स्वच्छता के संदेश दिस। एखर बर प्रधानमंत्री नरेन्द्र मोदी ह एक कार्यक्रम म ओखर पैर छू के ओला सम्मानित करे रिहिस हे।
स्वच्छता दूत कुंवर बाई के आज रायपुर के आंबेडकर अस्पताल म बिहनिया 10.40 बजे निधन हो गे। पीछे दू हफ्ता ले उंखर तबियत खराब चलत रिहिस हे। गुरुवार के ओला धमतरी ले रायपुर रेफर करे गिस हे। अउ अंबेडकर अस्पताल के आईसीयू म कुंवर बाई ल भर्ती कराए गिस हे। जिहां वो ह आखरी सांस लीस ।
दिवंगत आत्मा के शांति बर ईश्वर ले प्रार्थना करिस डॉ. रमन ह
मुख्यमंत्री डॉ. रमन सिंह ह राज्य के प्रसिद्ध स्वच्छता दूत कुंवर बाई के निधन म गहरा दु:ख व्यक्त करिस हे। मुख्यमंत्री ह उंखर परिवार के प्रति संवेदना प्रकट करत हुए दिवंगत आत्मा के शांति बर ईश्वर ले प्रार्थना करिस हे। डॉ. सिंह ह शोक संदेश म कहिन कि श्रीमती कुंवर बाई ह बकरियां बेचे ले मिले रकम ले घर म शौचालय बनवा के स्वच्छता के प्रति लोग मन म जागरूकता बर एक अनोखा उदाहरण पेश करिस हे।
