प्रधानमंत्री के अगुवाई म देस के सनातन संस्कृति ला मिलिस नवा मान: मुख्यमंत्री श्री साय

• राजधानी रायपुर म आयोजित ‘सोमनाथ स्वाभिमान पर्व’ म सामिल होइन मुख्यमंत्री
• 75 बछर पहिली आजे के दिन सोमनाथ मंदिर के पुनर्निर्माण के काम होय रिहिस पूरा

रायपुर, मुख्यमंत्री विष्णुदेव साय आज राजधानी रायपुर के महादेव घाट म स्थित हाटकेश्वर महादेव मंदिर परिसर म आयोजित “सोमनाथ स्वाभिमान पर्व” म सामिल होइन। ए मऊका म ओमन जनप्रतिनिधि अउ श्रद्धालु मन के संग गुजरात के सोमनाथ मंदिर ले वर्चुअली (वीडियो के माध्यम ले) जुड़े प्रधानमंत्री नरेंद्र मोदी कोति ले करे गे पूजा-आरती ला देखिन अउ ओखर भाषण ला सुनिन। प्रधानमंत्री नरेंद्र मोदी ह ए बखत सोमनाथ मंदिर के सुग्घर इतिहास, विदेशी हमलावर कोति ले करे गे हमला, मंदिर के पुनर्निर्माण के यात्रा, अउ अभी के सरकार कोति ले आस्था के केंद्र ला सहेज के रखे के संकल्प के संग कतको बिषय म अपन बात देसवासी के संग साझा करिन।

मुख्यमंत्री श्री साय ह कार्यक्रम ला संबोधित करत प्रदेशवासी ला “सोमनाथ स्वाभिमान पर्व” के बधाई दीन। ओमन कहिन कि 75 बछर पहिली आजे के दिन सोमनाथ मंदिर के पुनर्निर्माण के काम पूरा होय रिहिस अउ ए ऐतिहासिक मऊका ला पूरा देस म स्वाभिमान पर्व के रूप म मनाय जावत हे।

ओमन कहिन कि सोमनाथ मंदिर म कतको बार बाहरी हमलावर ह हमला करिन, फेर मंदिर के आस्था अउ परंपरा ला खतम नइ करे जा सकिस। श्री साय कहिन कि पहिली बार हमला के बखत मंदिर के पुजारी अउ श्रद्धालु ह मंदिर ला नइ छोड़िन अउ अपन जान के कुरबानी दे दीन। मुख्यमंत्री ह कहिन कि ओखर त्याग आज घलो इतिहास म सुनहरी अक्छर म लिखे हे।

श्री साय ह कहिन कि देस के आजादी के बाद उही बखत के गृह मंत्री लौह पुरुष सरदार वल्लभभाई पटेल ह सोमनाथ मंदिर के पुनर्निर्माण के संकल्प ले रिहिन। ओमन कहिन कि वो समे देस के पहिली राष्ट्रपति डॉ. राजेंद्र प्रसाद ह कतको बिरोध के बाद घलो सोमनाथ मंदिर पहुँचिन अउ नवा बने मंदिर के लोकार्पण कार्यक्रम म सामिल होइन। श्री साय ह प्रधानमंत्री नरेंद्र मोदी के बखान करत कहिन कि ओखर अगुवाई म देस के सनातन संस्कृति अउ आध्यात्मिक परंपरा ला नवा गौरव मिले हे। ओमन कहिन कि आज देस भर के प्रमुख तीर्थ, मंदिर अउ धार्मिक जगह के विकास तेजी ले होवत हे। मुख्यमंत्री ह कहिन कि बनारस के काशी विश्वनाथ, उज्जैन के महाकाल ले लेके सोमनाथ मंदिर तक बड़े पैमाना म विकास के काम करे जावत हे।

मुख्यमंत्री ह कहिन कि छत्तीसगढ़ सरकार घलो परदेस के धार्मिक अउ सांस्कृतिक जगह के विकास बर लगातार काम करत हे। ओमन बताइन कि परदेस म देवी माता के मंदिर ला ‘शक्तिपीठ योजना’ के माध्यम ले विकसित करे जावत हे। उही रद्दा म कबीरधाम जिला म स्थित भोरमदेव महादेव मंदिर ला ‘स्वदेश दर्शन योजना’ के तहत 148 करोड़ रूपया के मंजूरी मिले हे अउ उहाँ पर्यटन सुबिधा के बिस्तार अउ सौंदर्यीकरण के काम करे जावत हे। ओमन कहिन कि छत्तीसगढ़ ह माता कौशल्या के जनमभुइँया अउ भगवान श्रीराम के ननिहाल आय। सनातनी के लंबा लड़ाई के बाद अयोध्या के मंदिर म भगवान श्रीरामलला के प्राण प्रतिष्ठा होय हे। मुख्यमंत्री ह कहिन कि राज्य सरकार के ‘श्री रामलला दर्शन योजना’ के माध्यम ले अब तक 40 हजार ले जादा श्रद्धालु अयोध्या जाके प्रभु श्रीराम के दर्शन कर चुके हें अउ ए योजना ह लगातार चलत हे।

मुख्यमंत्री ह अपन भाषण के आखिरी म सबो झन ला भाईचारा, सामाजिक मेल-जोल अउ देस के एकता ला मजबूत बनाय रखे के संकल्प ले के गोहराय दीन।

कार्यक्रम ला संबोधित करत वन मंत्री केदार कश्यप ह कहिन कि प्रधानमंत्री नरेंद्र मोदी के अगुवाई म पूरा देस म सनातन संस्कृति अउ आस्था के केंद्र ला सहेज के रखे के काम लगातार होवत हे। ओमन कहिन कि हमर मुखिया घलो परदेस म धार्मिक जगह के रक्षा के संग अलग-अलग योजना के माध्यम ले मनखे मन ला आस्था ले जोड़े के काम करत हें। राजस्व मंत्री टंकराम वर्मा ह कहिन कि सोमनाथ मंदिर ह देस के संस्कृति, वैभव अउ स्वाभिमान के प्रतीक आय। प्रधानमंत्री श्री मोदी के अगुवाई म भारत ह अपन सांस्कृतिक विरासत ला फेर ले स्थापित करत हे। ओमन कहिन कि प्रदेश म नक्सलवाद के खातमा के बाद पर्यटन अउ धार्मिक जगह के विकास ला नवा रफ़्तार मिले हे। कृषि मंत्री रामविचार नेताम ह कहिन कि सोमनाथ मंदिर ह सनातनी के आस्था के बड़े केंद्र आय। ओमन कहिन कि हजार बछर के इतिहास म कतको हमला के बाद घलो सनातन संस्कृति के आस्था ला कोनो हिला नइ सकिस हे अउ न कभू अइसन होही।

मुख्यमंत्री विष्णुदेव साय ह राजधानी रायपुर के महादेव घाट म स्थित हाटकेश्वर महादेव मंदिर पहुँचीन। ओमन भगवान शिव के पूजा-आरती करिन अउ प्रदेशवासी के सुख-समृद्धि के असीस माँगिन। ए मऊका म कृषि मंत्री रामविचार नेताम, वन मंत्री केदार कश्यप, राजस्व मंत्री टंकराम वर्मा, विधायक पुरन्दर मिश्रा, छत्तीसगढ़ निःशक्तजन वित्त एवं विकास निगम के अध्यक्ष लोकेश कावड़िया, महापौर मीनल चौबे, जिला पंचायत अध्यक्ष नवीन अग्रवाल अउ कतको जनप्रतिनिधि उपस्थित रिहिन।