अब ग्रामीन बैंक के मैनेजर अउ कइसियर ह जेल के रोटी खाही

रायपुर। छत्तीसगढ़ ग्रामीण बैंक साखा रवेली  जिला कबीरधाम म 6 बछर बाद 88 लाख रुपिया के फर्जीवाड़ा के खुलासा होइस हे । 122 किसान मन के नाम म फरजी क्रेडिट कार्ड बनाके रुपिया निकाले गिस हे।  जांच के बाद ब्रांच मैनेजर अजय श्रीवास्तव, कइसियर आनंद कुंभकार समेत 5 झन ल गेरफ्तार करे गेहे। अउ सबो ल जेल भेज देय गेहे।  मामला 2012-13 के हवय।

मिले जानकारी म 2012 म  बैंक साखा रवेली म अजय श्रीवास्तव ब्रांच मैनेजर रहिस हे। उमन ह  बैंक कइसियर अउ 5 एजेंट के संग मिलीभगत कर फरजी दस्तावेज मन के आधार म 122 किसान के नाम फरजी क्रेडिट कार्ड बनाके 88 लाख रुपए के लोन बांट दिस।

किसान मन के नाम एक लाख रुपिया के लोन पास होइस हे।  उहें 50 हजार के पास होए के बात कहि के  सबो झन ल 50-50 हजार देय गिस। बचे 50 हजार रुपिया ल बैंक मैनेजर, कइसियर अउ एजेंट मन ह आपस म  बांट लिस। एमा सबके हिस्सा तय रहिस हे। लोन के 50 हजार रु.म ले 30 हजार रु. बैंक मैनेजर रखत रहिस हे । 10 हजार रुपए कइसियर, चपरासी अउ एजेंट मन ल 3- 3 हजार रु. बांट देवत रहिस हे।

लोन फरजीवाड़ा म 5 एजेंट काम कर रहिन हे।  ए केस के एजेंट द्वारिका चंद्रवंशी निवासी ग्राम राम्हेपुर हे, जे अभे पकड़ा नइए।  दूसर गणेश कुर्मी निवासी ग्राम कारीमाटी ह।  एखरो घलो गेरफ्तारी नइ होए हे। तीसरा लखनपुर गांव निवासी धरम चंद्रवंशी, चउथा सोढ़ा गांव के परसू गेंड्रे  अउ पांचवा कारीमाटी गांव के राजेन्द्र चंद्रवंशी हे,  इमन के गेरफ्तारी होइस हे । पांचों मूलत: किसान हवय।  एम घलो बैंक ले लोन लय हे, लेकिन ब्रांच मैनेजर ह इमन ल  लोन न चुकाए के  लालच देके धोखाधड़ी म सामिल कर लिस। ए एजेंट अपन-अपन क्षेत्र म लोगन ल झांसा म लेके बैंक लात रहिन हे।

अइसन खुलिस राज ले परदा

साल 2014 म ग्राम कारीमाटी के रहइया एक व्यक्ति ल  ग्रामीण बैंक रवेली साखा ले जब 2.50 लाख रुपिया पटाए के नोटिस मिलिस हे त होश उड़ गिस।  बैंक म ओला बताए गिस के उंखर नाम म करीब 20 एकड़ जमीन हे, जेखर आधार म केसीसी (किसान क्रेडिट कार्ड) देय गेहे।  भूमिहीन मजदूर ह नोटिस ले जादा ए बात ले हइरान  रहिस हे के एजेंट द्वारिका चंद्रवंशी ह  ओला अइसन कुछु  बताइस। अइसने ही 17 भूमिहीन लोगन के सिकायत आइस। नवा ब्रांच मैनेजर ह छानबीन कराइस। जांच म पता चलिस के जेमन ल नोटिस भेजे गेहे, उंखर  नाम त लोन संबंधी कागजात म हे। उहें फोटो कोने दूसरे के हैं। बैंक ऑडिट कराए म  पता चलिस के 122 किसान के नाम म फरजी लोन बांटे गेहे।  पिपरिया थाना म धोखाधड़ी के रिपोर्ट दरज कराए गेहे।