उमेद, रजनेश, शशिमोहन अउ प्रशांत समेत 16 अधिकारी मन ल आईपीएस अवार्ड बर हरी झंडी

रायपुर। गृह विभाग ह पांच जिला मन के एसपी समेत राज्य सेवा के 16 पुलिस अफसर मन ल आईपीएस अवार्ड देय बर हरी झंडी दे दीस हे। डीपीसी के बइठक म तय होय के बाद हफ्ताभर म ये अफसर मन ल आईपीएस अवार्ड के नोटिफिकेसन जारी हो सकत हे। येखर सबले बड़ असर उन पांच एसपी उपर होही, जेमन ल आईपीएस नइ होय के कारन निरवाचन आयोग हटाये के तइयारी म हे। येमा सीएम के गृह जिला कवर्धा, धमतरी, कोरिया, जशपुर अउ बलरामपुर के एसपी हे, जेमन आईपीएस नइए। जेमन ला आईपीएस अवार्ड दे जाही उमन म दुखुराम आंचला, बीपी राजभानू, डीएलएस आर्मो, सरजूराम सलाम, गोवर्धन राम ठाकुर, तिलक राम कोशिमा, प्रशांत कुमार ठाकुर, अजातशत्रु बहादुर सिंह, डॉ. लाल उमेद सिंह, विवेक शुक्ला, रजनेश सिंह, शशिमोहन सिंह, राजेश कुकरेजा, दर्शन सिंह मरावी, श्वेता राजमणि और यशपाल सिंह सामिल हे। ये सबो राज्यसेवा के 1995, 96 अउ 97 बैच के अफसर हे।