एक-एक सीट के विस्तार ले जानकारी लीस राहुल ह…..

परदेस  के कांग्रेस नेता मन ह पेस करिस चुनावी रपट

रायपुर । छत्तीसगढ़ विधानसभा चुनाव के नतीजा आय के पहिली ही सरकार बनाय के दावा ठोकई प्रदेश के वरिष्ठ कांग्रेस नेता मन ह राष्ट्रीय अध्यक्ष राहुल गांधी के ल चुनावी रपट सउपिन। नेता मन ह  परदेस म कांग्रेस के का स्थिति हे एखर बारे म विस्तार ले जानकारी दीस। सबो के बात सुने के बाद राहुल गांधी ह नेता मन ल अच्छा कार्य करे बर बधाई दीस हे। उमन के कहिना हे के राज्य म कांग्रेस के सरकार पूर्ण बहुमत ले बनत हे।

शुक्रवार के राहुल गांधी ह छतीसगढ़ के वरिष्ठ नेता मन के दिल्ली म बइठक लीस। बइठक म परदेश प्रभारी पीएल पुनिया, पीसीसी अध्यक्ष भूपेश बघेल, नेता प्रतिपक्ष टीएस सिंहदेव, सांसद ताम्रध्वज साहू, चरणदास महंत, मोतीलाल वोरा, देवती कर्मा, शिव डहरिया, मोहम्मद अकबर, सत्यनारायण शर्मा समेत कई वरिष्ठ नेता मवजूद रहिन हे।

कांग्रेस अध्यक्ष राहुल गांधी ह नेता मन ले उंखर विधानसभा क्षेत्र अउ आसपास के सीट मन के संबंध म जानकारी लीस हे। राहुल गांधी  ह प्रदेस  के सबो  90 विधानसभा के बारे म पूछिस अउ एक-एक सीट के विस्तार ले जानकारी लीस हे। परदेस  प्रभारी पीएल पुनिया ह मीडिया  ल बताइस  के  चुनाव परिनाम ल लेके राहुल गांधी आस्वस्त हे। बइठक म छत्तीसगढ़ कांग्रेस के नेता मन ह बताइन के  भाजपा के तरफ ले परिनाम ल प्रभावित करे के कोसिस करे जात हे,  एखर  सेती प्रत्याशी मन ल खास तउर  म सचेत रहे बर कहे गेहे। राहुल गांधी ह कहिन के  परिनाम आय तक चुनाव ल खत्म नइ मानना चाही। मतगनना  बर घलोक सतरक रहना चाही। भीतरघाती मन के बार म पुनिया ह कहिन के ब्लाक कांग्रेस अध्यक्ष, जिला कांग्रेस अध्यक्ष मन कोती ले भीतरघाती मन चिन्हित करे जात हे । जेमन ह  पार्टी विरोधी काम करिस  हे, उमन उपर जरूर कार्रवाई करे जाही।  पीसीसी अध्यक्ष भूपेश बघेल ह बताइन के बइठक म चुनाव के बाद के समीक्षा करे गिस हे। छत्तीसगढ़ कांग्रेस ह पीएल पुनिया के नेतृत्व म जे काम कर हे, ओखर ले  राहुल गांधी संतुष्ट दिखिस हे। मतगनना ल लेके राहुल गांधी ह टिप्स घलो दिस  हे। भाजपा ल लोकतंत्र म विस्वास नइए,  उमन कोनो भी हद तक जा सकत हे, एखर सेती राहुल  ह मतगनना  म विसेस धियान देय के बात कहिस हे ।