“कांग्रेस ल सपोर्ट करथे नक्सली मन के सहरी नेटवरक ”

सहरी नक्सलवाद सब्द के जिकर करत हुये कांग्रेस उपर निसाना साधिस रमन ह
जगदलपुर। अरबन नक्सल सशब्द अब सहर ले निकल के जगदलपुर और छत्तीसगढ़ म विधानसभा चुनाइ के मुद्दा घलो बन गेहे। शुक्रवार के जगदलपुर पहुंचे छत्तीसगढ़ के मुख्यमंत्री रमन सिंह ह सहरी नक्सलवाद सब्द के जिकर करत हुये कांग्रेस उपर निसाना साधिस हे। मुख्यमंत्री ह कहिन के नक्सली मन के सहरी नेटवरक कहु न कहु प्रत्यक्छ-अप्रत्यक्छ रुप ले कांग्रेस ल सपोट करत हे। उमन ह कहिन के नक्सली मन के एजेंडा रहे हे लोकतंत्र के विरोध करना। नक्सली मन ह बीजेपी के स्थानीय जनप्रतिनिधि मन ल जान ले मारे अउ कांग्रेस के जनप्रतिनिधि मन ल जनअदालत म खड़ा करे के फरमान ल लेके करेगे सवाल के जवाब म मुख्यमंत्री ह ये बात कहिन।
रमन सिंह ह कहिन के नक्सली मन के खेलाफ उंखर सरकार के लड़ाई जारी हे अउ जल्द ही नक्सली मन के सफाया होही। मुख्यमंत्री रमन सिंह अटल विकास यात्रा के तहत जगदलपुर के लाल बाग मइदान म पहुंचे रहिस हे। जिहां उमन दल्लीराजहरा-जगदलपुर 235 किलोमीटर के रेल परियोजना म जगदलपुर ले रावघाट तक बनइया रेल मारग के डिजिटल सिलान्यास करिन। मुख्यमंत्री ह लगभग 2 हजार 5 सौ 38 करोड़ रुपिया के रावघाट-जगदलपुर परियोजना के तहत 140 किलोमीटर लम्बा रेल मारग निरमान बर भूमिपूजन अउ सिलान्यास करिन।