कांग्रेस सरकार के एक अउ बड़े तोहफा……हाउसिंग बोर्ड के मकान खरीदइया मन जल्द ही मिलही  मालिकाना हक

रायपुर । राज्य सरकार नवां साल म लोगन ले एक अउ बड़े तोहफा देय बर जात हे।  हाउसिंग बोर्ड के मकान खरीदी करइया मन ला जल्द ही पूरा मालिकाना हक देय जाही। मंत्री शिव डहरिया के मुताबिक जउन मकान मालिक  मन ह लंबा बेरा  ले राहत हे अउ जे मन अपन पूरा किस्त पटा देय हे, उमन ल जल्द ही फ्री होल्ड कर देय जाही।

डहरिया ह कहिन के 600 स्कावायर फीट तक के मकान ल फ्री होल्ड करे बर रजिस्ट्री के कोनो सुल्क नइ होहीं, उहें 600 स्कावायर फिट ले  जादा के मकान म 1. 1 प्रतिसत सुल्क लेके सबला फ्री होल्ड करे जाही। ए एक बड़े निरनय हे। एमामे प्रदेस के सबो नगरीय निकाय, नगर निगम, नगर पालिका, नगर पंचायत के अंतरगत जेखर किस्त पट चुके हे, उमन ला पूरा मालिकाना हक देय जाही।

उहें नगरीय प्रसासन मंत्री शिव डहरिया ह 50 प्रतिसत संपत्ति कर कम करे के बारे म कहिन के  प्रॉपर्टी टैक्स म 50 प्रतिसत कम करे के बात कहे गेहे। एमा प्रक्रिया पूरा हो गेहे। हमन सचिव अउ विभाग के अधिकारी मन ल आदेस देय हन के उमन लोगन 50 प्रतिशत टैक्स कम करे के पूरी तइयारी कर लेवय। ए निरनय घलो बहुत जल्द ही पूरा होवइया हे। जन घोसना पत्र म जतना वादा कांग्रेस पार्टी ह करे हे ओ ला पूरा करे गेहे।