खास खबर….रतनपुर पालिका अध्यक्ष  ल वापिस बुलाए बर  चुनाव 31 दिसंबर के

17 हजार 421 मतदाता मन चुनाव चिन्ह भरे कुर्सी अउ खाली कुर्सी म ले चुनाव  बर  इवीएम के बटन दबाही

बिलासपुर। जिला के रतनपुर नगरपालिका अध्यक्ष आशा सूर्यवंशी ल वापिस  बुलाए बर 31 दिसंबर के मतदान होही। उहें शहीद नूतन सोनी स्कूल म मतगनना होही अउ अउ नतीजा घोसित करे जाही। ईवीएम चेक करे बर  हैदराबाद ले  इंजीनियर आही।  छत्तीसगढ़ म राइट टू रिकॉल के तहत ए  पहिली चुनाव होही।  सासन  ह राइट टू रिकॉल  बर चुनाव आयोग ल  पत्र भेजे रहिस हे।  रतनपुर नगरपालिका परिषद म आशा सूर्यवंशी अध्यक्ष हे। उमन कांग्रेस पार्टी के सदस्य हे।

नगरपालिक में कांग्रेस के अध्यक्ष आशा सूयज्ञवंशी ल वापिस बुलाए बर चुनाव होवत हे। परिषद म सात कांग्रेस अउ सात भाजपा अउ एक निर्दलीय पार्षद हवय। सूर्यवंशी के खेलाफ कांग्रेस-भाजपा के असंतुष्ट पार्षद मन ह आरोप लगात हुए उमन ल पद ले हटाए बर कलेक्टर ले  मांग करे रहिन हे।

कलेक्टर  ह एला राज्य सासन ल समुचित कार्रवाई बर भेजे रहिस हे। राज्य सासन ह चुनाव आयोग ल राइट टू रिकॉल बर पत्र लिखिस हे। राज्य निर्वाचन आयोग ह चुनाव कराए बर  घोसना करत हुए कार्यक्रम जारी करिस हे।

चुनाव कराए के जुम्मा स्थानीय निर्वाचन के हवय।  रतनपुर नगर पालिका के 15 वार्ड के 25 मतदान केंद्र म चुनाव  बर स्थानीय निर्वाचन  ह तइयारी सुरू कर दीस हे।  नगर पालिका के 17 हजार 421 मतदाता मन चुनाव चिन्ह भरे कुर्सी अउ खाली कुर्सी म ले चुनाव  बर  इवीएम के बटन दबाही।

स्थानीय निर्वाचन के सहायक अधीक्षक मनोज धनंजय ह बताइस के  25 मतदान केंद्र बर 25 इवीएम फर्स्ट लेवल चेंकिंग के बाद स्थानीय निर्वाचन ले रतनपुर भेजे जाही।  पांच इवीएम रिजर्व के तउर म भेजे  जाही।