खास खबर : लोकसभा चुनाव : रायपुर सीट ले राजकमल सिंघानिया के दावेदारी…. दिल्ली म वासनिक ले करिन मुलाकात

नई दिल्ली। लोकसभा चुनाव म बेहतर प्रदरसन बर  छत्तीसगढ़ कांग्रेस के चुनावी रननीति बनना सुरू हो गेहे। छत्तीसगढ़ प्रदेस कांग्रेस कमेटी के मोर्चा संगठन, प्रकोष्ठ अउ विभाग मन के प्रदेस अध्यक्ष मन के विगत दिन एक अहम बइठक होइस हे। जेमा एआईसीसी ले लोकसभा चुनाव बर मिले दिसा-निरदेस मन के जानकारी दे गिस। अउ एखर प्रभावी क्रियान्वयन बर चरचा  चर्चा करे गिस।

विधानसभा चुनाव म तीन चौथाई बहुमत ले जीत के बाद प्रदेस के सबो 11 लोकसभा सीट मन म जीत बर पुरजोर कोसिस करे जात हे। अउ पार्टी रननीति अउ कार्ययोजना के मुताबिक काम म जुट गेहे। राज्य म कांग्रेस सरकार के किसान मन के कर्ज माफी, 25 सौ रुपिया प्रति क्विंटल म धान खरीदी, टाटा के जमीन वापसी, छोटे प्लाट मन के रजिस्ट्री जइसे जनहित फइसला ल आम लोगन  तक जादा ले जादा पहुंचाय जा सकय,एला लेके घलोक रननीति तइयार करे गेहे।

दूसर ओर रायपुर लोकसभा ले पार्टी के टिकट म चुनाव लड़इया मन के नाम अब  आघू आना सुरू हो गेहे हे।  ताजा घटनाक्रम के मुताबिक कसडोल ले पार्टी के पूर्व विधायक राजकमल सिंघानिया लोकसभा चुनाव लड़ना चाहत हे।  सूत्र मन के मुताबिक सिंघानिया ह ​नई दिल्ली म एखर बर  गहलोत अउ मुकुल वासनिक जइसे नेतामन ले मुलाकात कर अपन इच्छा जताइस हे। हालांकि  जय जोहार  ह जब उंखर ले फोन म बात करिस त  उमन खुलके कुछु नइ बोलिस अउ अइसन कोनो मुलाकात ले इंकार करिस। लेकिन उँखर संगवारी मन के मानन त रायपुर लोकसभा ले लड़े बर जुगाड़ लगाए के जानकारी मिलिस।

मालूम हो के सिंघानिया कसडोल ले विधानसभा चुनाव घलो लड़ना चाहत रहिस  हे,  लेकिन पार्टी ह टिकट नइ दीस अउ नवां चेहरा ले चुनाव लड़वा दिस।  सिंघानिया ए इलाका ले दू बेर ले विधायक रह चुके हे अउ रायपुर सहर विधानसभा ले घलो चुनाव लड़ चुके हे। उँखर  समर्थक मन ह  बताइन के भैया ह दिल्ली जाके अपन पक्ष रखे हवय अउ चुनाव लड़े के इच्छा जताए हे।  राजकमल सिंघानिया के कसडोल, भाटापारा, रायपुर ग्रामीन, रायपुर सहर के अलावा मंदिर हसौद अउ धरसींवा म घलो व्यापक जनाधार हे। अगर उमन ल पार्टी टिकट देवत हे त उमन लोकसभा चुनाव लड़ सकत हे। हालांकि अभु सब कुछु प्रारंभिक स्तर म ही हे।