चिखली ले आरंग तक लड्डू, केला अउ सेब ले तउले गिस  शिव डहरिया

रायपुर। नगरीय प्रशासन मंत्री डॉ. शिवकुमार डहरिया  मंगलवार के दिन रायपुर जिला, विकासखण्ड आरंग के कई ठन गांव मन म आयोजित आभार रइली म सामिल होइन। मंझनिया बारह बजे ग्राम चिखली ले आरंग तक आयोजित आभार रइली (रोड शो) म ऊंखर स्वागत बर जन सैलाब उमड़ परिस। लइका, सियान अऊ महिला मन के संग स्कूली छात्र-छात्रा मन ह घलोक मंत्री डॉ. डहरिया के उत्साह के संग स्वागत करिन। आभार रइली आरंग के बेसिक स्कूल प्रागंण म देर रात खतम होइस।

 आभार रइली के पहिली डॉ. डहरिया ह ग्राम जुनवानी म परम पूज्य गुरू बाबा घासीदास के सत्य के चिनहा जैतखाम के पूजा अरचना करिन अऊ प्रदेसवासी मन के खुसी अऊ उन्नति बर आसीरवाद मांगिन। आभार रइली ह गांव-गांव, गली-गली गुजरत करीब पचास किलोमीटर के सफर तय करिस। रोड शो म आस-पास के गांव मन के ग्रामीन मन घलोक सइकड़ा के संख्या म पहुंचिन अऊ उत्साह के संग अभिनंदन करिन।

डहरिया के स्वागत पारंपरिक लोक नृत्य ले

 मंत्री बने के बाद डॉ. डहरिया के स्वागत पारंपरिक राउत नाचा दल, पंथी नृत्य दल, गाड़ा बाजा, सुआ नृत्य दल मन के संग बहुत अकन लोक कलाकार मन ह घलोक करिन। आभार रइली के संगे संग युवा मन ह बाईक रइली निकालिन अऊ जमके आतिशबाजी करिन।

समाज, संगठन अऊ संस्था मन कोति ले हार्दिक स्वागत

रोड शो म साहू समाज, सतनामी समाज, कुर्मी समाज, निषाद समाज, यादव समाज, मरार समाज, अग्रवाल समाज, गुप्ता समाज, सेन समाज, लोधी समाज, साहनी समाज, विकासखण्ड कर्मचारी संघ, पंचायत सचिव संघ चतुर्थ श्रेणी कर्मचारी संघ, बिल्डिंग मटेरियल एसोसिएशन, आंगनबाड़ी कार्यकर्ता संघ, रसोईया संघ, रजक समाज, महिला स्व सहायता समूह,  मुस्लिम समाज, व्यापारी संघ, ब्राह्मण समाज, सिन्धी समाज के संग कई ठन सामाजिक, राजनैतिक, सांस्कृतिक अऊ आर्थिक संगठन अऊ संस्था मन कोति ले नगरीय प्रशासन मंत्री डॉ. शिव डहरिया के जगा-जगा फूल माला अऊ नाड़ू, केला, सेब के फल मन ले हार्दिक स्वागत करे गीस। ए अवसर म बहुत अकन जनप्रतिनिधि अऊ नागरिक बड़ संख्या म उपस्थित रहिन।