जगदलपुर जेल म आत्महत्या के कोसिस… मामला ल दबाय म जुटिस जेल प्रसासन

रायपुर। केंद्रीय जेल जगदलपुर म मंगलवार के बिहनिया ओ बेरा म हड़कंप मचगे। जब एक कइदी ह फिनायल पीके आत्महत्या के कोसिस करिस। घटना के जानकारी मिलत ही ओला तुरंत मेडिकल कॉलेज अस्पताल डिमरापाल म भरती कराय गिस।  एती जेल प्रसासन ह मामला ल दबाय के कोसिस करत हे।

मिले जानकारी  म कइदी के नाम अमित हे। अस्पताल के सूत्र मन ह घटना के  पुष्टि करे हे। उमन बताइन के  अमित ल फिनाइल पीए के कारन इहां भरती कराय गेहे। हालांकि अस्पताल प्रबंधन ह घलोक ए घटना ल छिपाए के कोसिस करत हे। उहें जेल प्रसासन ह अइसे घटना होय ले इंकार करिस हे।  जेलर अमित शांडिल्य ले जब  ए संबंध म पूछे गिस, त उमन के कहिना रहिस के,  अभु पता नइ चले हे के अइसन कोनो घटना होय हे। जब उमन ल बताय गिस के कइदी ल अस्पताल म भरती कराय गेहे, तब उमन कहिन के,  अभु फिनाइल पीए के पुष्टि नइ होय हे, काबर के कइ बेर  कइदी झूठ घलोक बोल देथे।

आप  मन ल बता दन के,  मेडिकल कॉलेज परिसर  म ए घटना के जानकारी हो चुके हे के,  एक कइदी ह फिनाइल पीए के कारन इहां भरती हवय। भरती बर बनाए   परती म घलो ए बात के उल्लेख हे अउर एमएलसी दस्तावेज म घलो फिनाइल पीए के जिक्र हे, एखर बाद जेल प्रसासन के जवाब गोल-मोल हवय। बहरहाल, ए बात के पता नइ चल पाय हे के कइदी अमित ह आत्महत्या के कोसिस काबर करिस हे।