बिहान योजना ह बदलिस बेरोजगार महिला मन के  जिनदगी

गोविंदकुमार साहू…. धमतरी । छत्तीसगढ़ के जिला-धमतरी म बिहान योजना के चलत बेरोजगार महिला मन के जिनदगी ह संवर गिस। जिहां पहिली महिला मन ल  पति के ऊपर निरभर रहिना पड़य उहें अब उमन आत्मनिरभर हो गे।

दरअसल, बिहान योजना ले जुड़े के बाद गृहणी महिला मन ल  ट्रेनिंग लेके आटो चलाना सिखिस, मखाना अउ मसरूम के खेती करना जानिस, घरेलू उत्पाद बनाना सीखगे, केंटीन खोलिन, गांव-गांव म माइक्रो एटीएम के सुविधा देवत हे, किराना दुकान अउ फैनसी दुकान खोले अपन बेरोजगारी ल दूर करत आत्मनिरभर बन गेहे।

 जिला के आज अधिकतर बेरोजगार महिला मन स्वलंबी हो चुके हे। अपन पइर म  खड़े हो चुके  हे अउ हर महिना 8000/- ले 10,000/-   रुपिया  कमावत हे।  आज इहीं कड़ी म 8 जनवरी के जनपद पंचायत धमतरी म सेल्स मार्केटिंग काऊंसलिंग कार्यक्रम म सिनियर अधिकारी अभिजीत भट्टाचार्य, रजिया मैडम, फारेन ले आए अनुष्का मेम, गाईडर भीमसिंह साहू , अभिषेक बेनर्जी एपीओ जिला पंचायत धमतरी, प्रेम सिन्हा बीपीएम अउ जनपद पंचायत धमतरी के बिहान योजना के अधिकारी अउ योजना ले जुडे महिला मन आत्म निरभर होय के बारे म जानकारी देवत हुए समस्या के बारे म पूछताछ करत हुए ओखर निदान करिस हे।

ए बेरा म महिला मन के बताइन के… पति के कमाई ले हमन घर गिरहस्ती चलाए म  काफी दिक्कत के सामना करना पड़त रहय। लइका मन के पढ़ाई लिखाई लेके खुद के छोटी-मोटी जरूरत बर पति के ऊपर निरभर होना पड़य। लेकिन  आज हमर जइसे कतको बहिन मन ह बिहान योजना ले जुड़ के अपन  काम करत हुए  लइका मन ल अच्छा स्कूल म पढ़ावत हवन। जे घर चलाए म दिक्कत होत रहिस हे वो दूर होगे। अब हमन सुग्गर जिनगी जीवत हवन।