जनहित म सरकार लेवत हे तुरते फइसला : सीएम बघेल

झरिया समाज के कार्यक्रम म सामिल होइन मुख्यमंत्री

रायपुर ।मुख्यमंत्री भूपेश बघेल काली दुर्ग जिला के विकासखण्ड पाटन के ग्राम कौही म छत्तीसगढ़ झरिया समाज कोति ले आयोजित नारायण देव जयंती कार्यक्रम म सामिल होइन। ए अवसर म मुख्यमंत्री ह समाज के मनखे मन ल बधाई अउ सुभकामना दीन। उमन कहिन के जनहित म सरकार तुरते फइसला लवत हे। श्री बघेल ह झरिया समाज ल संवैधानिक लाभ लेहे म आवत दिक्कत मन ल दूर करे बर जरूरी पहल करे बर आश्वस्त करिन। कार्यक्रम म समाज कोति ले मुख्यमंत्री बघेल ल चिनहा भेंट करके सम्मानित करे गिस। ए अवसर म प्रदेश स्तरीय युवक-युवती परिचय सम्मेलन के घलोक आयोजन करे गीस।

मुख्यमंत्री श्री बघेल ह कहिन के छत्तीसगढ़ झरिया (महार अउ महरा) समाज कोति ले आयोजित ए कार्यक्रम म सामिल होके मोर मन ल प्रसन्नता होवत हे। उमन कहिन कि सामाजिक कार्यक्रम मन म सामिल होए ले समाज के कई ठन गतिविधि मन ल जाने अऊ समझे के अवसर मिलथे। मुख्यमंत्री ह समाज के मनखे मन ल संगठित होके समाज अऊ प्रदेश के विकास म योगदान देहे के आव्हान करिन। श्री बघेल ह कार्यक्रम म किसान अऊ मजदूर मन के हित म लेहे गए बहुत अकन फइसला मन के जानकारी दीन।  विजय कौशल ह समाज के तरफ ले संवैधानिक बाधा मन ल दूर करे बर करे जात के कार्य मन के जानकारी दीन। ए अवसर म समाज के प्रांताध्यक्ष चंद्रभान मेश्राम संग आन पदाधिकारी, स्थानीय जनप्रतिनिधि अऊ बड़ संख्या म समाज के मनखे उपस्थित रहिन।