स्वास्थ्य सुविधा मन ल बेहतर बनाए बर मुख्यमंत्री ह डॉक्टर मन ले मांगिंन सुझाव

मुख्यमंत्री सामिल होइन न्यूरो सर्जन मन के अंतर्राष्ट्रीय सम्मेलन म

रायपुर। मुख्यमंत्री भूपेश बघेल ह कहिन के प्रदेश म स्वास्थ्य के क्षेत्र म अड़बड़ काम करे के जरूरत हे। राज्य सरकार के ये मंशा हे के प्रदेश के दूर-दराज इलाका के मनखे मन ल अच्छा स्वास्थ्य सुविधा के लाभ मिलय। उमन कहिन के एखर बर उपलब्‍ध कराए गए संसाधन मन के सही उपयोग सुनिश्चित करे जाना चाही।

मुख्यमंत्री शुक्रवार के राजधानी म  न्यूरो सर्जन मन के चार दिवसीय अंतर्राष्ट्रीय सम्मेलन ’इंटरनेशनल ट्रांसफोर्मिनल इंडोस्कोपिक लंबर स्पाइन सर्जिकल कॉन्फ्रेंस’ के दूसर दिन के सत्र ल मुख्य अतिथि के आसंदी ले सम्बोधित करत रहिन। उमन दीप प्रज्जवलित करके सत्र के शुभारंभ करिन। स्वास्थ्य मंत्री  टीएस सिंहदेव विशेष अतिथि के रूप म कार्यक्रम म उपस्थित रहिन।

मुख्यमंत्री  बघेल ह डॉक्टर मन ले आग्रह करिन के ओ मन छत्तीसगढ़ म स्वास्थ्य सुविधा के अऊ जादा सुधार अउ मरीज मन के हित म महत्वपूर्ण सुझाव राज्य सरकार ल देवंय। राजधानी रायपुर के अम्बेडकर अस्पताल के सेवा ल अऊ जादा बेहतर कइसे बनाये जा सकत हे। एखर संबंध म घलोक चिकित्सक अपन सुझाव देवंय।

मुख्यमंत्री ह कहिन के आज के भागदौड़ भरे जीवनशैली के सेती पीठ के पीरा बाढ़ गए हे। ये प्रसन्नता के विसय हे के अब छत्तीसगढ़ के राजधानी रायपुर म रीढ़ के तकलीफ के इलाज के विश्वस्तरीय सुविधा हावय। उमन रायपुर म अंतर्राष्ट्रीय सम्मेलन के आयोजन के सराहना करत कहिन के छत्तीसगढ़ ल ए आयोजन के लाभ मिलही। विदेश मन ले आए खांटी जानकार मन ले छत्तीसगढ़ के चिकित्सक मन ल काफी कुछ सीखे ल मिलही।

स्वास्थ्य मंत्री टीएस सिंहदेव ह आयोजन के सफलता बर शुभकामना दीन। उमन उम्मीद जताये हें के अवइया समय म छत्तीसगढ़ ‘चिकित्सा विशेषज्ञता’ के प्रमुख केन्द्र के रूप म उभरही। उमन कहिन के राज्य सरकार चिकित्सा सुविधा मन के विस्तार बर हर संभव सहयोग देही।

सत्र ल डॉ. संदीप दवे अऊ डॉ. एस.एन.मढरिया ह घलोक सम्बोधित करिन। ए अवसर म डॉ. सतीशचन्द्र गोरे, डॉ. तनुश्री सिद्धार्थ संग बहुत अकन चिकित्सक उपस्थित रहिन। मुख्यमंत्री ह ए अवसर म डॉ. मेलकम के पुस्तक ‘ट्रांसफारमिनल स्टीचलेस स्पाइंन सर्जरी अन्डर लोकल एनिस्थिसिया’ के विमोचन करिन।