झगड़ा अइसन के तोड़ डालिस हॉस्टल के टेबल-कुर्सी ल

रायपुर। पेंसनबाड़ा स्थित बॉयज हॉस्टल म आपसी विवाद के चलत छात्र मन के दू गुट भिड़ गे। दूनों गुट के बीच जमके मारपीट होइस। हॉस्टल  के टेबल-कुर्सी ल तोड़ डाले गिस।  छात्र मन ह मउका म पहुंचे डायल-112 के पुलिस वाहन ल घलो नइ छोड़िन। एमा घलो तोड़-फोड़ करिन। बड़ संख्या म पुलिस बल पहुंचे के बाद मामला शांत होइस। हॉस्टल के माहउल ल देखत हुए पुलिस फोर्स ल 24 घंटा बर तइनात कर देय गेहे।

पुलिस के मुताबिक पेंसनबाड़ा म अनुसूचित जाति-जनजाति छात्रावास हे। एखर  दू हॉस्टल म 300ले अधिक छात्र रहत हे अउ अलग-अलग स्कूल-कॉलेज मन म  पढ़त हवय।  18 दिसम्बर के हॉस्टल म गुरु घासीदास जयंती के आयोजन करे गिस।  था। रात म करीब 1.30 बजे सांस्कृतिक कार्यक्रम चलत रहिस हे तभे पुराना विवाद  ल लेके छात्र मन के एक गुट ह उत्पात मचाना सुरू कर दिस।  एखर विरोध म दूसर गुट के छात्र  आघू आइन।  एखर बाद दूनों गुट म मारपीट अउ पत्थरबाजी सुरू होगे। । मउका म पुलिस के डायल-112 के गाड़ी पहुंचिस। छात्र मन ह एमा घलो अपना गुस्सा उतारिन।  पत्थरबाजी ले गाड़ी के सीसा टूट गे। एखर बाद घलो छात्र मन के बीच विवाद नइ थमाइस। बाद म पुलिस ह दूनों पक्ष ल शांत कराइन।

बुधवार के बिहनियां एसडीएम के उपस्थिति म हॉस्टल के छात्र नेतामन, वार्डन के बइठक कराय गिस। दूनों पक्ष ह उपद्रव नइ मचाए के आश्वासन दिन। एखर बाद मामला सांत होइस। एहतियात के तउर पर बड़ संख्या म पुलिस बल तइनात करे गेहे।