डाक मतपत्र ल लेके नवां मोरचा खोल दिस कांग्रेस ह

जशपुर। विधानसभा चुनाई के मतदान के बाद स्ट्रांग रूम के विवाद अभु तक ठीक ले सुलझे नइए। उहें दूसर ओर कांग्रेस ह डाक मतपत्र ल लेके नवां मोरचा खोल दिस हे। कांग्रेस के कुनकुरी विधानसभा प्रत्याशी यूडी मिंज ह जिला म  चुनावी डयूटी म तइनात करेगे सरकारी कर्मचारी अउ पुलिस के अधिकारी- जवान मन ल  पर्याप्त मात्रा म डाक मतपत्र उपलब्ध नइ कराय जाय के आरोप लगाइस हे।

उमन कहिन के  पर्याप्त डाक मतपत्र उपलब्ध नइ होय के कारन चुनाव ड्यूटी म लगे मतदाता मन मतदान करे ले वंचित हो गिस हे । एखर ले चुनाव के परिनाम प्रभावित होय के आसंका जतात हुए ये प्रणाली ल फेल करार दिस हे अउ  जिला निर्वाचन अधिकारी ल आवेदन देके जारी करेगे डाक मतपत्र के जानकारी  मांगिस हे। उहें स्ट्रांग रूम के आघू पहरा देवत कांग्रेस के कार्यकर्ता के होय मउत के घटना के बाद कांग्रेस ह सुरक्षाकर्मी मन ल ठंड ले बचाव बर  उचित बेवस्था करे के मांग घलोक जिला निर्वाचन अधिकारी ले करिन हे।