डॉक्टर के ए निरनय के  चलत तुमगांव अस्पताल परिसर म होइस हंगामा

महासमुंद। तुमगांव अस्पताल परिसर म मंगलवार संझा लाश रखके ग्रामीन  हंगामा करिन। बतादन के लास पटेवा थाना क्षेत्र के परसापाली के भुनेश्वरी यादव पति हीरालाल यादव (25) के हे। मंगलवार बिहनिया लगभग 9 बजे महिला के पटेवा स्थित सरकारी अस्पताल म जचकी होइस।

बताय जात हे के महिला के पेट म ही लइका ह दम तोड़ देय रहिस हे। अत्यधिक खून बहे के सेती  पटेवा अस्पताल ले महिला ल रायपुर  बर  रेफर कर देय गिस ।  राद्दा म  महिला के हालत बिगड़ गिस, लिहाजा महिला ल  तुमगांव स्थित सामुदायिक स्वास्थ्य केंद्र ले जाय गिस। जिहां डॉक्टर  ह निरीक्षन के बाद महिला ल मृत घोषित कर दिस। मृतका के परिजन लाश लेके गांव पहुंचिन, तभे तुमगांव अस्पताल ले फोन  आ गिस के  लास ल वापस लाय जाय।  परिजन लास लेके अस्पताल वापस पहुंचिन, जिहां डाक्टर ह जिला अस्पताल म लास के पोस्टमार्टम कराए के बात कहिन। एमा परिजन मन कहिन के डाक्टर  साहब आपन  तभे बताए होते त अब तक पोस्टमार्टम हो चुके रहितिस। पर आपन  ह पहिली त लाश घर ले जाए कह देव, फेर  घर पहुंचे  के बाद लास मंगवात हव। ए मामला म  परिजन अउ गांव वाले अस्पताल प्रबंधन ले आक्रोसित हो गिस। अउ परिसर म लास रखके हंगामा करे लगिन।