पखांजूर ल किरीसी महाविद्यालय अउ विद्युत वितरन कम्पनी के संभागीय कारयलय के सउगत

आबादी पट्टा के वितरन के समस्या के घलो समाधान जल्द : रमन
कांकेर। मुख्यमंत्री रमन सिंह ह पखांजूर म लगभग 109 करोड़ रुपिया के लागत के कारय मन के भूमिपूजन-लोकारपन करिन। सीएम रमन ह पखांजूर म किरीसी महाविद्यालय खोले के ऐलान करिन हे। रमन ह विद्युत वितरन कंपनी के संभागीय कारयलय प्रारंभ करे के मंजूरी दीस हे।
सीएम रमन सिंह ह कहिन के मैं अटल विकास यात्रा म आम जनता के पाछू 15 बछर ले होय विकास कारय मन के जानकारी दे बर निकलिस हे। सीएम ह कहिन के पाछु 15 बछर म सड़क, बिजली, पानी, सिक्छा अउ स्वास्थ्य समेत समाज के सबो वरग मन बर अनेक योजना मन ल राज्य सरकार ह संचालित करे हे, जेखर ले आम लोगन के जीवन म खुशहाली आइस हे।
मुख्यमंत्री ह जनता के आग्रह म पखांजूर म किरीसी महाविद्यालय अउ विद्युत वितरन कम्पनी के संभागीय कारयलय प्रारंभ करे के घोसना करिस। उमन ह पंखाजूर के श्यामाप्रसाद मुखर्जी स्टेडियम म मरम्मत अउ द्वार निरमान बर 25 लाख रुपिया अउ निखिल बंग समाज के सामाजिक भवन निरमान बर 20 लाख रुपिया के स्वीकृति के घोसना घलो करिन। मुख्यमंत्री सिंह ह ये अवसर म क्षेत्र के विकास बर लगभग 109 करोड़ रुपिया के लागत ले विभिन्न निरमान कारय मन के लोकारपन अउ भूमिपूजन करिस हे।
सीएम ह कहिन के ये क्षेत्र म आबादी पट्टा के वितरन के समस्या के घलो जल्द समाधान हो जाही। ये संबंध म कलेक्टर ल परीक्षन कर कार्रवाई के निरदेस देय गेहे। लोकसभा सांसद विक्रम उसेण्डी अउ विधायक भोजराज नाग समेत अनेक जनप्रतिनिधि अउ ग्रामीन मन बड़ संख्या म ये अवसर म उपस्थित रहिन।