प्रदेस के मेहनतकस किसान मन ल मिलही 2400 करोड़ रूपिया के धान बोनस : रमन

रायपुर। मुख्यमंत्री डॉ रमन सिंह ह सोमवार के बिलासपुर जिला के पेंड्रा विकासखण्ड के ग्राम कोटमी म आमसभा ल सम्बोधित करत हुए कहिन के प्रदेस के मेहनतकस किसान मन ल समर्थन मूल्य म धान खरीदी म ये बछर 2400 करोड़ रूपिया के बोनस मिलही। किसान मन ल धान के वाजिब मूल्य दिलाय बर प्रधानमंत्री नरेन्द्र मोदी ह धान के समर्थन मूल्य म एकमुश्त प्रति क्विंटल 200 रूपिया के बढ़ोत्तरी करिस हे। राज्य सरकार ये बछर प्रति क्विंटल 300 रूपिया के धान बोनस देवत हे। ये मिला के किसान मन ल 2050 ले 2070 रूपए प्रति क्विंटल धान के कीमत मिलही। उमन कहिन के एक नवम्बर ले धान की खरीदी सुरू होय म किसान मन ल धान के समर्थन मूल्य के संग बोनस रासि घलो भुगतान करे जाही। मरवाही घलो मेहनतकस किसान मन के क्षेत्र हे। येखर लाभ पूरा प्रदेस के संग ये क्षेत्र के किसान मन ल घलो मिलही।
मरवाही के सासकीय उच्चतर माध्यमिक विद्यालय मइदान म आयोजित आम सभा म नगरीय प्रसासन मंत्री अमर अग्रवाल, जिला पंचायत के अध्यक्ष दीपक साहू समेत अनेक जनप्रतिनिधि अउ बड़ संख्या म ग्रामीन उपस्थित रहिन हे। मुख्यमंत्री ह ये अवसर म क्षेत्र के विकास बर लगभग 132 करोड़ रुपिया के लागत के 49 कार्य मन के लोकारपन अउ भूइंया पूजन करिस हे। उमन ह लगभग 113 करोड़ 44 लाख के 26 कार्य मन के भूमिपूजन अउ 18 करोड़ 24 लाख के 23 कार्य मन के लोकरपन करिन अउ विभिन्न कल्यानकारी योजना मन के अंतरगत हितग्राही मन ल सामग्री अउ सहायता रासि वितरित करिस।