बदल सकत हे अजीत जोगी के पार्टी के नाम …. ए हे वजह

रायपुर। छत्तीसगढ़ म जनता कांग्रेस छत्तीसगढ़ (छजकां) सुप्रीमो अजीत जोगी ह पार्टी के नाम जल्द बदलइया हे। जेसीसीजे यानि जनता कांग्रेस छत्तीसगढ़ के नाम ल बदल के पार्टी सुप्रीमो जोगी कुछु अउ कर सकत हे।  अजीत जोगी ल ए  लगत हे के उमन ए चुनाव म बड़ नुकसान उंखर दल के नाम म कांग्रेस सब्द लिखे जाए के  वजह ले होइस हे।

पार्टी सुप्रीमो अजीत जोगी ह  कहिन के पार्टी नाम बदले ल लेके जल्द ही एक बइठक बुलाए जाही।  जेखर बाद पार्टी के नवा नाम रखे ल लेके चरता करे जाही।  एमा नाम बदले ल लेके  आम सहमति बने के बाद फइसला कर जाही। एखर संग ही अजीत जोगी  ह आगामी लोकसभा चुनाव म घलो अपन पार्टी ल चुनावी मइदान म उतरे के बात कहिन हे।

छजकां सुप्रीमो अजीत जोगी  कहिन के फिलहाल त उंखर पार्टी के नाम जनता कांग्रेस छत्तीसगढ़ जोगी हे, लेकिन अक्सर प्रचलित नाम बदल जाथे।  उमन कहिन के जोगी कांग्रेस एक प्रचलित नाम हे।  एखर सेती  जब तक ए नाम रहही तब तक ए कंफ्यूजन बने रह ही । अइसे म ए कंफ्यूजन ल दूर करे बर उमन अपन कार्यकारिणी ले पार्टी के नाम बदले ल लेके निवेदन करही।  उमन कहिन के  अपन पार्टी के नवां के संग आगामी लोकसभा चुनाव म जाना चाहत हे। हालांकि एखर पहिली  पार्टी के बइठक होही। जेमा  नाम बदले या नइ बदले ल लेके तमाम बिंदुओं म विस्तृत चरचा होही।