रायपुर। बलौदाबाजार म जल सकंट गहरात जात हे, फेर अधिकारी मन ये समस्या ल लेके गंभीर नइ दिखत हे। उहें करोड़ों के लागत ले बने एनीकेट ले पानी घलो लीकेज होत हे। 4 बछर ले तुरमा गांव म बनत एनीकेट के निर्मान अभू तक पूरा नइ हो पाइस हे। लोगन मन पानी बर ऐती-ओती भटके बर मजबूर हे, उहें लोगन कई घांव लोगन मन के पानी बर आपस झड़प घलो हो जाथे। येकर बाद भी प्रसासन हाथ म हाथ धरे बइठे हे।
कौशिक ल राय ल कारण बताओ नोटिस
छत्तीसगढ़ राज्यसभा चुनाव म व्हिप के उल्लंघन करके मामला म विधायक सियाराम कौशिक अउ आरके राय ल कारण बताओ नोटिस जारी करे गेहे। प्रदेश कांग्रेस के महामंत्री गिरीश देवांगन ह नोटिस जारी करिस हे। ये मामला म 7 दिन के भीतर जवाब देए के निर्देश दे गेहे। बतादन कि पहिली ले दूनों विधायक निलंबित करे जा चुके हे। अब एखर मन के जवाब मिले के बाद निष्कासन केकार्रवाई हो सकत हे।
पुलिस नक्सली मुठभेड़ म चार महिला नक्सली ढेर, मउका ले जखीरा बरामद
जगदलपुर ले लगे ओडिशा सीमा क्षेत्र म पुलिस नक्सली मुठभेड़ म चार महिला नक्सली के ढेर होय के खबर हे। एखर अलावा पुलिस ह घटना स्थल ले 10 किट बैग, 3 एसएलआर, 1 इंसास रायफल, दो 303 रायफल घलो बरामद करिस हे। बताए जात हे कि कोरापुट जिला के नारायण पटना थाना क्षेत्र म एनकाउंटर होइस हे । एती बर पुलिस के दावा हे कि 8 से 10 नक्सली मारे गे हे। सूत्र मन के कहिना हे कि 4 महिला नक्सली के शव बरामद कर ले गेहे। मउका म सर्च ऑपरेशन जारी हे ।
प्रधानमंत्री उपर निसाना साधत हुए अपन आपा खो दिस चरणदास महंत ह
जांजगीर म कांग्रेसी नेता चरणदास महंत ह केन्द्र सरकार अऊ प्रधानमंत्री उपर निसाना साधत हुए अपन आपा खो दिस। ये दउरान ओहर प्रधानमंत्री के खिलाफ अइसन भासा के इस्तेमाल करिस, जोन ल लोकतंत्र म सोभा नइ दय। ये दउरान ओहर कहिस कि प्रधानमंत्री ल भारतीय संस्कृति अऊ सभ्यता के समझ नइ हे। महंत ह राज्यसभा चुनई म कांग्रेसी बिधायक मन ल बोट नइ दे ल लेके कहिस, कि एक पहिली ले निस्कासित हे, दूसर ल घलो निस्कासित करे जाही। व्हीप के उल्लंघन कोनो भी सूरत म बर्दास्त नइ होही।
लोगन मन के समस्या सुनके निराकरन घलो करिस केदार ह
मंत्री केदार कश्यप रविवार दोपहर समाधान सिविर म हिस्सा ले बर कोंटा पहुंचिस, अऊ सिविर म लोगन मन के समस्या सुनके निराकरन घलो करिस। संग ही ओहर एक सामुदायिक भवन, स्ट्रीट लाइट अऊ रैन बसेरा दे के घोसना करिस हे। जेकर बाद भाजपा के पदयात्रा म सामिल होइस। ये दउरान बस स्टैण्ड म नुक्कड़ सभा ल घलो संबोधित करिस। जिहां बड़ संख्या म भाजपा नेता अऊ कार्यकर्ता मउजूद रिहिन।
कांग्रेसी अऊ भाजपाई मन आपस म भिड़ गिन
रायपुर उत्तर बिधानसभा क्षेत्र तात्यापारा वार्ड म रविवार के भाजपा बिधायक श्रीचंद सुंदरानी के नेतृत्व म जनसंपर्क यात्रा निकाले जात रिहिस। ये दउरान कांग्रेसी अऊ भाजपाई मन आपस म भिड़ गिन। माहौल गरमात देख पुलिस ह मोर्चा संभालिस। दुन्नों पार्टी के पदाधिकारी अऊ कार्यकर्ता मन एक दूसर के उपर गंभीर आरोप लगाइन। ये मामला अतका बाढ़ गिस कि महिला मन घलो प्रदर्सन करत सड़क म मटका लेके बइठ गिन। एकर बाद पुलिस ह समझाइस देके मामला ल सांत कराइस।
