भानुप्रतापपुर म मरीज मन के जान के संग खिलवाड़….समय म नइ पहुंचिस संजीवनी एक्सप्रेस ह

भानुप्रतापपुर । संजीवनी 108 के समय म न पहुंचे ले एक महिला ल अपन जिंदगी ले हाथ धोना पड़िस। गुरूवार के भानुप्रतापपुर विकास खण्ड के ग्राम बाँसला के 40 वर्षीय महिला के तड़के 4:00 बजे अचानक तबीयत खराब होगे। तब परिजन मन ह 108 ल फोन लगाइस। 108 म फोन नइ लगे ले 102 ल फोन लगाय गिस। 102 नंबर म बात त होइस लेकिन उमन गाड़ी भेजे म असमरथता जाहिर करिन। इही दउरान महिला के हालत अउ बिगड़ गिस जेखर ले परिजन अउ ग्रामवासी मन ह जइसे-तइसे मोटरसाइकिल ले भानुप्रतापपुर अस्पताल लाइन, जिहां इलाज के दउरान महिला ह दम तोड़ दिस।
बांसला म अइसे दू बार अउ हो चुके हे कि संजीवनी समय म नइ पहुंचिस अउ लोगन ल अपन जान ले हाथ धोना पड़िस हे। ये तरह ले ग्रामीन अंचल म आज घलो लोगन बर सरकारी तंत्र एक मजाक बन गेहे, जेखर खामियाजा गरीब अउ जनता मन ल उठाय बर पड़त हे।
अतना ही नइ जब परिजन मन ह दुर्ग र्कोंदल के 108 ल भेजे के बात कहीन, तब उमन ल बताय गिस के दूनों गाड़ी ह मरीज लाय बर गेहे। जबकि आज जय जोहार अस्पताल म पता करिस त पता चलिस के दुर्गु कोंदल के गाड़ी त पाछु एक महीना ले खराब हे अउ भानुप्रतापपुर के 108 अउ 102 दूनों वाहन बिहनिया 8:00 बजे तक भानुप्रतापपुर अस्पताल परिसर म ही खड़े रहिस हे।