भोजपुरी सुपरस्टार दिनेशलाल यादव निरहुआ ल नकारिस छत्तीसगढ़ी सिनेप्रेमी मन

दीपक बावनकर,रायपुर। भोजपुरी सनिमा के सुपरस्टार दिनेशलाल यादव निरहुआ के छत्तीसगढ़ म नइ जम पावत हे पइठ, निरहुआ हिंदुस्तानी 3 ह सात दिन म बटोरिस महज 40,000 ।

दरअसल भोजपुरी सनिमा म छत्तीसगढ़ी कलाकार मन ल पसंद नइ करे जाय। उहीं तरह छत्तीसगढ़ी सिने प्रेमी मन ह  घलोक भोजपुरी के सुपरस्टार दिनेश लाल यादव निरहुआ ल नकार दिस । कुछु दिन पहिली राजधानी के प्रभात सनिमा म उंखर फिलम निरहुआ हिंदुस्तानी 3 प्रदरसित होय रहिस हे।  ए  फिलम म  भोजपुरी  कलाकार के संग छत्तीसगढ़ के घलोक कई कलाकार मन ह काम करे रहिस हे।  निरहुआ हिंदुस्तानी 3 ल प्रभात टॉकीज म 1 हफ्ता बर रिलीज करे गिस, जिहा ए  फिलम ह  सात दिन म महज 40,000 रुपिया बटोर पाइस।  ए कलेक्शन ले टॉकीज के किराया  घलोक नइ निकालय। सूत्र मन के कहिना हे के निरहुआ हिंदुस्तानी 3 भोजपुरी म काफी हिट हे, लेकिन छत्तीसगढ़ म ए  फिलम के जमानत जप्त हो गिस । दिनेश लाल यादव निरहुआ  ह  अपन फिल्म के संग  हिंदुस्तानी जोड़े के  सिलसिला छत्तीसगढ़ म फिलम मन के रीमेक बनाय ले सुरू करिस । इहां सुपरहिट  फिल्म टूरा रिक्शावाला के रीमेक निरहुआ रिक्शावाला के नाम ले बनाके  दिनेश लाल यादव ह काफी नाम कमाइस । उखंर बाद लैला टिप टॉप छैला अंगूठा छाप ल घलोक रीमेक कर निरहुआ हिंदुस्तानी बनाइइस अउ  फेर चल पड़िस निरहुआ हिंदुस्तानी टू ,  निरहुआ हिंदुस्तानी 3 के सिलसिला। ए बीच  म उमन  राम लखन अउ दिलवाला जइसे फिलम घलोक बनाइस। लेकिन ए  फिलम मन ह घलो कोनो खास रिजल्ट नइ दिस। कुल मिलाके माने जाए त छत्तीसगढ़ी अउ भोजपुरी म खासा अंतर नइए।  उहां के बोलचाल,  लोकेसन  अउ कलाकार मन के एक्टिंग छत्तीसगढ़ी फिलम होथे वइसने हवय। लेकिन उहां के गीत संगीत अउ  इहां के गीत संगीत म जमीन आसमान के अंतर हे । जे ला न त इहां के लोगन हजम कर पावत हे अअउ न ही उहां के लोग हजम कर पावत हे । कुल मिलाके छत्तीसगढ़ के कलाकार मन ल उहां स्थापित होय म  अगर एड़ी चोटी के जोर लगाना पड़त हे त   इहाँ घलोक भोजपुरी के कलाकार मन ल जमे बर पसीना बहयल पड़थे।