भोरमदेव महोत्सव म लोगन मन के कम भीड़

कवर्धा। भोरमदेव म बुधवार ले 2 दिवसीय भोरमदेव महोत्सव के सुभारंभ होइस। जेमा कई मंत्री समेत बड़े नेता मन घलो सामिल होइन। आप मन ल बता दन कि महोत्सव के पहिली दिन कथक रॉकर्स के संग शिव-तांडव के प्रस्तुति के लोगन मन आंनद उठाइन। उहें महोत्सव म आंचलिक कलाकार मन ल मंच नइ मिले ले ओमन म खासा नाराजगी दिखई दिस, संग ही पाछु बछर के अपेक्षा ये बछर भोरमदेव महोत्सव म लोगन मन के कम भीड़ देखे बर मिलिस। महोत्सव के समापन गुरूवार के होही। जेखर मुख्य अतिथि पर्यटन व सहकारिता मंत्री दयालदास बघेल हवय।
बेमेतरा म लोक सुराज के आवेदन मन के निराकरन सुरु
बेमेतरा म लोक सुराज के अंतर्गत सिकायत बर आए आवेदन मन के निराकरन सुरु हो गे हे। जेकर अंतर्गत जिला प्रसासान नियोजित कार्यक्रम के अनुसार गांव म सिविर लगाके समस्या के निराकरन करे जात हें। ये कड़ी म पाहंदा गांव के सिविर म पहुंचे कलेक्टर कार्तिकेय गोयल ह लोगन मन के समस्या के समाधान करिस, अऊ लोगन मन ल हितग्राही मूलक योजना के अंतर्गत सामग्री के बितरन घलो करिस।
नान घोटाला के सीबीआई जांच याचिका के सुनवाई 4 अप्रैल तक
बिलासपुर। हाई कोर्ट ह नान घोटाला के सीबीआई जांच कराए के मांग ल लेके दाखिल याचिका उपर सुनवाई 4 अप्रैल तक बढ़ा दे हे। याचिकाकर्ता के अधिवक्ता ह मामला म एसीबी के बिसेस कोर्ट म ट्रायल सुरु होए अऊ याचिका के तीन बछर ले लंबित होए के चलत अंतिम बहस पूरा करे के निवेदन करिस। आप मन ल बता दन कि 2014 म छत्तीसगढ़ राज्य नागरिक आपूर्ति निगम म चाउर, नून परिवहन म घोटाला होए के एसीबी ले सिकायत करे गे हे। जेकर ले नान के 27 अधिकारी अऊ कर्मचारी मन के ठिकाना उपर छापा मारे गिस। उहें अधिकारी मन करा ले 3 करोड़ 63 लाख रुपिया जब्त कर गे रिहिस। कोर्ट ह सुनवाई करत मामला के तारीख 4 अप्रैल सुनिस्चित करे हे।
बागनदी बन क्षेत्र के जंगल म अचानक भीसन आगि
राजनांदगांव। रास्ट्रीय राजमार्ग ले लगे बागनदी बन क्षेत्र के जंगल म अचानक भीसन आगि लगे ले दू सौ हेक्टेयर ले जादा के जंगल जलके खाक हो गिस। असल म बुधवार रतिया बन परिक्षेत्र म अज्ञात कारन ले भीसन आगि लग गिस। देखत ही देखत आगि पूरा जंगल म फइल गिस। उहें बन अमला ल ये आगजनी के घटना के भनक तक नइ मिलिस। रतिया बन बिभाग के अधिकारी ,कर्मचारी मउका ले गायब रिहिन। उहें ये जंगल म आगजनी के घटना ले जंगल म मौजूद करोड़ो के पेड़-पौधा जलके खाक हो गिस हे। आप मन ल बता दन कि एकर ले पहिली घलो ये जंगल म आगजनी के कई घटना हो चुके हे।
… कचरा फेंकिस लइका ह, महापौर ह ओकर ले उठक बइठक लगवाइस
रायपुर। महापौर प्रमोद दुबे ओ बेरा नाराज हो गिस, जब एक लइका ल सड़क उपर कचरा फेंकत देखिस। असल म महापौर स्टेसन रोड के डहार निकले रिहिस, तभे एक लड़का सड़क उपर कचरा फेंकत दिखिस। ओकर उपर महापौर ल अतका गुस्सा आइस, कि ओला ओहा तुरतेच दंड दे दिस, दंड म महापौर ह ओकर ले उठक बइठक लगवाइस।