बिलासपुर आईजी ह धोखाधड़ी के मामला के जांच बर बनाईस एसआईटी अउ अन्य समाचार

जांजगीर। जिला म धोखाधड़ी के बढ़त मामला ल देखत बिलासपुर आईजी के निर्देस म एसआईटी के गठन करे गे हे। एसआईटी के ये टीम, धारा 420 के तहत दर्ज मामला के तेजी ले कार्रवाई करही। उहें जिला म बहुत बेरा लंबित पड़े 75 ले ज्यादा धोखाधड़ी के मामले दर्ज हे। जेला देखत ये टीम के गठन करे गे हे।
छत्तीसगढ़ी होरी के फाग गीत गाए गिस शिकागो म
रायपुर। नार्थ अमेरिका छत्तीसगढ़ एसोसिएसन के द्वारा अमेरिका के शिकागो म होरी के तिहार अऊ वुमन्स डे के आयोजन करे गिस। छत्तीसगढ़ के जोन लोगन मन अमेरिका म रहत हे, ओमन येमा हिस्सा लिन। ये मउका म सांस्कृतिक कार्यक्रम के घलो आयोजन करे गिस। छत्तीसगढ़ी होरी के फाग गीत घलो गाए गिस।
मदन साहू साइकिल म घूम के देथे सद्भावना के सन्देस
बालोद। जिला के बंगला मटिया गांव के रहइया मदन लाल साहू साइकिल म देस-प्रदेस घूम के सद्भावना के सन्देस देथे, संग ही खतरनाक करतब घलो दिखाथे। आप मन ल बता दन कि मदन लाल साहू भारत के हर कोना चेन्नई, असम, राजस्थान, दिल्ली हर जगह साइकिल ले ही घुमत हे। उहें भारत के अलावा ओ ह नेपाल घलो साइकिल ले ही घूम के आए हे। जेकर बर ओला नेपाल सरकार ह प्रमाण पत्र घलो दे हे।
प्रेम प्रकाश पांडे ह सुनिस लोगन मन के समस्या
भिलाई। बीजेपी के जनसंपर्क यात्रा म जनता के बीच छत्तीसगढ़ प्रदेस के उच्च शिक्षा व राजस्व मंत्री प्रेम प्रकाश पांडे पहुंचिस। ये यात्रा भिलाई के खुर्सीपार ले सुरू होए हे, जेमा जनता ल सरकार द्वारा करे गे बिकास कार्य के बारे म बताए गिस। संग ही लोगन मन के समस्या सुनके ओमन के समाधान करे के आस्वासन घलो दे गिस। उहें ये रइली म सैकड़ो कार्यकर्ता मन घलो सामिल होइन।