मुख्यमंत्री के दावेदारी जनमदिन के बहाना म …दिल्ली दरबार म हाजरी लगाइस बड़े कांग्रेसी नेता मन

रायपुर । एक्जिट पोल म कांग्रेस के बढ़त मिले के खबर ले कांग्रेसी गदगदा गेहे। अउ उमन ल लगत हे के दिल्ली दूर नइए। अउ  सोनिया गांधी के जन्म दिन के बहाना के आड़ म दिल्ली दरबार म हाजिर घलो लगा के  मुख्यमंत्री  बर अपन दावेदारी  मजबूत करत हे।   

मंगलवार, 11 दिसंबर के परदेस म चुनाव के परिनाम घोसित होंही। अउ तस्वीर घो साफ हो जाही। सत्ता के चाबी काखर हाथ म हे। लेकिन सात दिसंबर के एग्जिट पोल आए के बाद कांग्रेसी नेता मन के जोस दुगना होगे हे। अउ मुख्यमंत्री के चाह रखइया दिल्ली दरबार म हाजिर लगत हे।  मजे के बात हे के उमन ल सोनिया गांधी के जन्मदिन के  बहाना घलो मिल गे हे। अभउ तक  पार्टी के सबो बड़ नेता दिल्ली दरबार म अपन हाजरी लगाए बर दिल्ली पहुंचे हे।  प्रदेस कांग्रेस अध्यक्ष भूपेश बघेल, नेता प्रतिपक्ष टीएस सिंहदेव, ताम्रध्वज साहू, चुनाव अभियान समिति अध्यक्ष चरणदास महंत, अरविंद नेताम समेत तमाम बड़ नेता मन के हुजूम दिल्ली म दिखाई देवत हे।

वइसे आज 9 दिसम्बर के कांग्रेस के पूर्व राष्ट्रीय अध्यक्ष सोनिया गांधी के जन्मदिन हे ।  लेकिन एक दिन पूर्व दिल्ली पहुंचे म बड़ नेता मन के कहिना हे के रविवार के सोनिया गांधी जन्मदिन म व्यस्त रहही। एखर सेती सबो शनिवार के ही उंखर ले मिले  बर पहुंचे हे। सियासी गलियारा म ए खबर हे के सोनिया गांधी के जन्मदिन के बहाना सबो बड़ नेता अपन मुख्यमंत्री पद के दावेदारी करे दिल्ली पहुंच गेहे । लगभग आधा दर्जन पदाधिकारी दिल्ली दरबार म पेस हो चुके हे ।

 सबले बड़ सवाल सीएम कउन

अगर सत्ता के कांग्रेस के हाथ म आ जाही त पार्टी के आघू ए बड़ सवाल खड़े हे के   सीएम पद के दावेदार कउन होही। । चुनाव के पहिली ले  आधा दर्जन भर  कांग्रेस के बड़ नेता कई बार खुले तउर  म अपन सीएम बने के इच्छा जाहिर कर चुके हे।