मुख्यमंत्री चयन  म नवां मोड़…..वोरा ह बदलिस करवट…. चिढ़ गे भूपेश समर्थक मन

रायपुर । छत्तीसगढ़ म मुख्यमंत्री चयन के लेके एक नवां मोड़ आए हे।  शनिवार बिहनिया मोतीलाल वोरा ह दुर्ग के सांसद अउ मुख्यमंत्री के दउड़ म सामिल  ताम्रध्वज साहू ल समर्थन दे के दावा करिन। ए खबर के जानकारी मिलत ही भूपेश बघेल के समर्थक मन  नाराज होगे।

छत्तीसगढ़ के मुख्यमंत्री के घोसना बर हाल कमान के पसीना निकल गेहे।जइसे- जइसे देर होवत हे वइसे- वइसे नवां मोड़ आघू आत हे।  सबले पहिली  मुख्यमंत्री के दउड़ म पीसीसी अध्यक्ष भूपेश बघेल ल आघू बतात रहिन हे। ओखर  नेता प्रतिपक्ष टीएस सिंहदेव के नाम  सबले उपर होगे। अब एक नवां मोड़ आ गे  अउ ताम्रध्वज साहू के नाम सबले ऊपर  म बताय जात हे।

दरअसल पूर्व मुख्यमंत्री मोतीलाल वोरा पहिली भूपेश बघेल ल समर्थन देवत रहिन हे। अचानक उमन दावा  करिन के सीएम के दउड़ म सामिल ताम्रध्वज ल समर्थन करत हवय। ए खबर के लगत ही काली ले  जश्न मनाइया भूपेश बघेल के समर्थकों म चिढ़ गे। मालूम हो ही के मोतीलाल वोरा, भूपेश बघेल अउ ताम्रध्वज साहू तीन झन दुर्ग जिला ले हे।

मुख्यमंत्री चयन ल लेके शुक्रवार के दिल्ली म राहुल गांधी ह इहां के चारों दावेदार भूपेश बघेल, टीएस सिंहदेव, चरणदास महंत अउ ताम्रध्वज साहू ले लंबी बइठक करिन।  चारों झन ले एक-एक कर के बात घलो करिस। । बइठक के बाद सीएम के घोसना होए के उम्मीद रहिस हे, लेकिन बइठक के बाद पर्यवेक्षक बनके आए मल्लिकार्जुन खड़गे ने कह दिस के सीएम के घोसना शनिवार के रायपुर म कांग्रेस विधायक दल के बइठक म करे जाही। आज रायपुर म कांग्रेस विधयाक दल के बइठक बुलाए गे हे।  ओखर पहिली ही ए नवां मोड़ आ गे।