राम नगर म फरजी मतदान लेके विवाद…….बूथ के बाहिर गरमाइस माहउल…. पुलिस के अतिरिक्त फोरस मंगाय गिस

रायपुर। पश्चिम विधानसभा के राम नगर म स्थित बूथ क्रमांक 123 म एक महिला के फरजी मतदान ल लेके विवाद होगिस। नगर निगम के सभपति प्रफुल विश्वकर्मा ये बात के जानकारी ले बर बूथ म पहुंचिस, उहां मतदान केंद्र के सुरक्छा म तइनात एक पुलिस करमी के पीठ म प्रफुल विश्वकर्मा ह हाथ मारिस। एखर बाद अचानक माहउल बिगड़ गे।  पुलिसकरमी ह बूथ म विवाद करे के बात कहत हुए प्रफुल विश्वकर्मा ल धक्का दे दिस। एखर बाद बाद माहउल अउ बिगड़ गिस। इही दउरान कांग्रेसी घलो बड़ी संख्या म उहां पहुंच गिन।  जेखर ले राम नगर के आंगनवाड़ी केंद्र म स्थापित बूथ के बाहिर माहउल गरमा गिस।

लोगन के बढ़त संख्या ल देखत हुए पुलिस के उहां अतिरिक्त फोरस मंगाय गिस। मतदान केंद्र के बाहिर मउजूद आरएएफ के जवान घलो हालात ल काबू करे के कोशिश करत रहिन हे। अइसे जानकारी मिले के भीड़ ल काबू करे बर हल्का बल प्रयोग घलो करे गेहे। ए बीच म बीच निर्वाचन आयोग ह कहिन के कइसे भी स्थिति म कोनो मतदाता ल मतदान ले वंचित नइ करे जाही। आयोग कइसनो भी स्थिति ले निपटने बर तइयार हे।