72 सीट मन म मतदान खत्म ……..सत्ता उपर कोन काबिज होही ये 11 दिसंबर के पता चलही

रायपुर। विधानसभा चुनाव 2018 बर दूसर चरन के 72 सीट मन म मतदान खत्म हो गेहे। येखर संग आवइया सरकार घलो तय हो चुके हे, लेकिन सत्ता उपर कोन काबिज होही ये 11 दिसंबर के पता चलही। 15 बछर ले राज्य के कमान संभालइया भाजपा ल वापिसी के उम्मीद हे त डेढ़ दसक ले विपक्छ म बइठे कांग्रेस ल ए दफा उम्मीद हे के उमन सत्ता म काबिज होही।

प्रदेस म पहली बार तीसरी सक्ति के रूप म जोगी-बसपा गठबंधन मइदान म उतरिस हे।  अन्य कतको के प्रत्यासी  घलोचुनाव मइदान म हे संगे-संग राज्य के सबो दल मन  के कतको बड़े नेता दूसर चरन चुनाव म प्रत्याशी हे। ए सब मन के राजनीतिक प्रतिष्ठा दांव म लगे हे।

दूसरे चरन के मतदान म बस्तर संभाग अउ राजनंदगांव जिला के 18 सीट मन ल  छोड़के बाकी 19 जिला मन के 72 सीटों बर वोट डाले गिस। जेमा रायपुर संभाग, दुर्ग संभाग, बिलासपुर संभाग अउ सरगुजा संभाग के सबो विधानसभा क्षेत्र सामिल हे। 72 सीट मन म नो मंत्री मन के अलावा कांग्रेस के एक सांसद के भाग्य के फइसला घलो ईवीएम म कैद हो चुके हे।

ए बड़े नेता मन केसाख दांव म………बृजमोहन अग्रवाल, राजेश मूणत, गौरीशंकर अग्रवाल, प्रेमप्रकाश पांडे, धरमलाल कौशिक, अमर अग्रवाल, अजय चंद्राकर, दयालदास बघेल, देवजी भाई पटेल, रामसेवक पैकरा, ननकीराम कंवर, चंद्रशेखर साहू, ओपी चौधरी, भूपेश बघेल, टीएस सिंहदेव, चरणदास महंत, रविंद्र चौबे, धनेंद्र साहू, सत्यनारायण शर्मा, मोहम्मद अकबर, शिव डहरिया, अमितेष शुक्ला, बदरुद्दीन कुरैशी, अमरजीत सिंह भगत, उमेश पटेल, अजीत जोगी, रेणु जोगी, धर्मजीत सिंह, सियाराम कौशिक, आरके राय, डॉ. विमल चोपड़ा सामिल हे।