लिफाफ म बंद हो गे मुख्यमंत्री के नाम …. पुनिया ह कहिन के ..संझा पांच बजे तक इंतजार करव  

रायपुर। छत्तीसगढ़ के मुख्यमंत्री कउन बनही एला लेके  दावेदार, विधायक, समर्थक अउ प्रदेश के जनता बेताब हवय। इस मसला म आज फेर दिल्ली म बइठक होइस।  एक घंटा तक चले बइठक म मुख्यमंत्री के दावेदार भूपेश बघेल, टीएस सिंहदेव, चरणदास महंत अउ ताम्रध्वज साहू के अलावा पर्यवेक्षक मल्लिकार्जुन खड़ेगे अउ प्रदेस प्रभारी पीएल पुनिया सामिल होइन। सूत्र मन बताइन के मुख्यमंत्री के नाम लिफाफा म बंद होगे हे, ए लिफाफा ह संझा कुन विधायक मन के बइठक म खुलही।

एती बइठक के बाद पुनिया ह पत्रकार मन ले चर्चा करत हुए कहिन के मुख्यमंत्री के घोसना आज संझा 5 बजे रायपुर म होही। काखर नाम म फइसला होइस त उमन कुछू काही बताए बर इंकार कर दिन।  आघू उमन कहिन के सबो नेता मन ह  राहुल गांधी के नेतृत्व म आस्था जता हे। आपमन ल संझा 5 बजे तक इंतजार करना पड़ही।

बइठक के बाद सबो नेता मन  दिल्ली ले विसेस  विमान ले 2 बजे के बाद रायपुर बर रवाना होही। रायपुर आए के बाद सबो  नेता राजीव भवन म कांग्रेस विधायक दल के बइठक म सम्मिलित होंही। इहां मुख्यमंत्री के नाम के घोसना करे जाही। ।

बइठक म अखिल भारतीय कांग्रेस कमेटी के छत्तीसगढ़ प्रभारी पीएल पुनिया, एआईसीसी के छत्तीसगढ़ सचिव डॉ. चंदन यादव अउ डॉ. अरुण उरांव, छत्तीसगढ़ के पर्यवेक्षक मल्लिकार्जुन खडग़े घलो सामिल होइस।