अंबिकापुर। हाथी मन के समस्या ले जूझत सरगुजा संभाग म वन महकमा ह अब विघ्नहर्ता के शरण म पहुंच गेहे। जंगल के भीतर के गांव मन म गणेश भगवान के पूजा-पाठ अउ हवन-पूजन कर लोगमन ल जागरूक करत हवय।
वन विभाग के करमचारी मन पारंपरिक वेशभूषा अउ वाद्य यंत्र मन के संग गाना-बजाना कर के लोगन मन ल जागरूक करे कोशिश करत हवय। दरअसल, समस्या हवय मनखे अउ हाथी के बीत के लड़ाई। जेमा भूख मिटाए बर हाथी मन खेत के फसल अउ घर म रखे धान ल खाए बर पहुंचत हे एती अपन जान-माल के रक्षा बर ग्रामीण मन हाथी मन ल दूर भगाए के कोशिश करत हे। एखर ले नाराज हाथी आक्रमण करथे । अइसे म वन अफसर मन के सोच हे कि लोगन मन ल जागरूक बनके हाथी मन के समस्या ल काबू म लाए जा सकत हे। हाथी मन ल भगवान गणेश के रूप मानथे, एखर सेती गांव-गांव म पंडित बुलवा के हवन-पूजन करे जात हे। एखर अलावा अलग-अलग नाचा दल घलो बनाए गेहे, जे मन ह गांव-गांव म जाके लोगन ल हाथी आए के बेरा म कइसे व्यवहार करे जाए ये बात ल बतावत हवय।