विधायक के गुमशुदगी के पोस्टर वायरल होवत हे

रायपुर। छत्तीसगढ़ विधानसभा चुनाव के घड़ी जइसे-जइसे नजदीक आवत हे वइसे-वइसे राजनीतिक सरगरमी घलोक बढ़त जात हे। भला चंद्रपुर विधानसभा क्षेत्र के राजनीति एखर ले अछूता काबर रहही? चंद्रपुर के विधायक घलो ये दिन मन खूब चरचा म हे। ये दिन मन उंखर गुमशुदगी के पोस्टर वायरल होवत हे। दरअसल, चंद्रपुर के विधायक युद्धवीर सिंह के मौजूदगी अपन विधानसभा म बहुत कम रहत हे। जेला लेके जनता कई बार उंखर मौजूदगी म घलोक शिकायत कर चुके हे।
विधायक के कार्यप्रणाली म कोनो सुधार नइ आइस
जांजगीर-चांपा जिला के चंद्रपुर विधानसभा क्षेत्र के तेज तर्रार विधायक अउ छत्तीसगढ़ ब्रेवरेज कॉरपोरेशन के अध्यक्ष युद्धवीर सिंह जूदेव एक बार फेर सोशल मीडिया म चरचा म हे। विधायक जूदेव के विधानसभा क्षेत्र म मौजूदगी कम होय के चलत कतको बार आम लोगन के शिकायत के बावजूद उंखर कार्यप्रणाली म कोनो सुधार नइ आइस हे।
वायरल होवत हे गुमशुदगी के वीडियो
विधायक युद्धवीर सिंह जूदेव खास अवसर मन म ही अपन विधानसभा क्षेत्र म दिखाई देथे। ये बात के नाराजगी ल लेके विपक्ष के लोगन मन ह दीवार म उंखर गुमशुदगी के पोस्टर चस्पा कर देहे अउ एखर वीडियो बनाके सोशल मीडिया म पोस्ट कर दे गेहे, जे ह खूब वायरल होवत हे।