संतों के शाही स्नान के संग समाप्त होगे राजिम कुंभ

रायपुर । माघ पूर्णिमा ले धर्म नगरी राजिम के त्रिवेणी संगम म आयोजित कुंभ के आज महाशिवरात्रि के दिन साधु-संत मन के शाही स्नान के संग समाप्त होगे। ए अवसर म भव्य शोभायात्रा निकलिस, एखर हज़ारों श्रद्धालु मन ह जोहर करिस। प्रदेश के धर्मस्व मंत्री बृजमोहन घलो शोभायात्रा म शामिल होइस। अउ साधु मन के अखाड़ा प्रदर्शन म तलवारबाज़ी करत दिखाई दिस।
नागा साधु मन के शस्त्र पूजा के संग विभिन्न सम्प्रदायों, आश्रमों, अखाड़ों के साधु-संत मन ह अपन- अपन आश्रम के निशान अउ झंडा के संग शाही स्नान बर शोभा यात्रा निकलिस। ए शोभायात्रा लोमश ऋषि आश्रम के पास बने संत समागम स्थल ले हो के नवापारा के नेहरू घाट ले नए पुल होके राजिम पहुंचिस। राजिम म पं.सुंदर लाल शर्मा चौक ले शास्त्री चौक होवत हुए साधु-संत मन त्रिवेणी संगम के शाही कुंड तक आइस।
शोभायात्रा की अगुवाई परंपरानुसार नागा साधु मन के दल करत रिहिस हे। आश्रम अउ अखाड़ के मुखिया साधु-संत मन घोड़ा अउ बग्गी म सवार हो के शोभा यात्रा म शामिल होइस। नवापारा अउ राजिम के जनता मन ह शोभा यात्रा के फूल बरसा के जोहर करिस। शोभायात्रा म शामिल नागा साधु मन के संग दूसर साधु मन ह घलो अपन-अपन हथियार के संग गजब के करतब दिखात अखाड़ा प्रदर्शन करत रिहिस हे।
ए अवसर म बृजमोहन अग्रवाल ह किहिस कि आज महाशिवरात्रि के पावन त्योहार म राजिम के त्रिवेणी संगम म पुण्य स्नान के सौभाग्य मिलिस हे। वो ह किहिस कि राजिम कुंभ के महिमा बढ़त जात हे। लाखों के संख्या म श्रद्धालु मन इहां आवत हवय। आज कुंभ के समापन के बेरा म ए नजारा दिखले मिलिस। श्री अग्रवाल ह अपन परिवार के संग कुंभ के कुंड म डुबकी लगाके पुण्य के लाभ पाइस। एखर बाद वो ह कुलेश्वर महादेव मंदिर म जाके पूजा अर्चना करत हुए भगवान ले छत्तीसगढ के मनखे मन के जीवन म सुख,शांति और समृद्धि के कामना करिस।