सचिव के गेंद म सहायक कर्मचारी ह जड़िस छक्का… का हे माजरा… जानव

 रायपुर। सचिव अपन बॉलिंग मार्क ले आघू निकल के गेंद जालिस अउ उंखर ए गेंद ल सहायक कर्मचारी ह मार दिस छक्का। एती फील्डर्स होगे हक्का-बक्का। अम्पायर के इसारा अउ टीम के खाता म जुड़गे छह रन।  कुछु अइसन ही कमेंट्री आजकल इंद्रावती भवन के गेट क्रमांक -3 ले  गुजरया मनखे मन ल अउ  सचिवालय म बइठइया कर्मचारी मन ल सुने बर मिलत हे। लोग घलो बड़े ही उत्सुकता के संग एखर प्रतीक्षा घलोक करथे।  कामकाज के बीच ए बात ल लेके घलोक  चरचा हे के मइच कइन टीम ह  जीतही? अगला मइच कउन-कउन  टीम के बीच म होही।

दरअसल नवां राजधानी अटलनगर के इंद्रावती भवन के गेट क्रमांक-3 के आघू के मइदान म मंत्रालयीन अधिकारी अउ कर्मचारी मन के बीच क्रिकेट प्रतियोगिता होवत हे। एखर फाइनल मइच 15 जनवरी के होही। एखर समापन समारोह म मुख्यमंत्री भूपेश बघेल अउ उंखर कैबिनेट के तमाम मंत्री सामिल होंही।  शुक्रवार के ए जानकारी कर्मचारी संघ के अध्यक्ष संतोष वर्मा ह दीस। उमन  बताइन के ए प्रतियोगिता म अब तक कुल 20 मइच खेले जा चुके हे।  ए स्परधा  के विजेता टीम ल 7 हजार रुपिया अउ शील्ड पुरस्कार स्वरूप दे जाही। उहें उप विजेता ल 5 हजार रुपया अउर शील्ड प्रदान करे जाही।