ससुराल वाले मन ले तंग आके महिला ह मांगिस इच्छा मृत्यु

कांकेर । जिला कार्यालय म ओ बखत हडकंप मचगे जब जनदर्शन म पहुंचे महिला ह कलेक्टर ले इच्छा मृत्यु बर अनुमति मांगिस। एखर बर महिला ह बकायदा कलेक्टर ल आवेदन भी दिस हे। बताए जात हे कि चारामा इलाका के ग्राम आवरी निवासी 25 बच्छर के आहिल्या निषाद ह ससुराल वाले मन उपर अत्याचार के आरोप लगात हुए इच्छा मृत्यु के मांग करीस।
अहिल्या ह प्रशासन ल बताइस कि ओखर ससुराल वाले मन ह ओला शारारिक अउ मानसिक कष्ट देथे। एखर संग मदद करइया मन ल घलो धमकात रहिथे। एखर सेती महिला ह चारामा थाना म रपट घलो लिखवाइस हे। लेकिन कोनो कार्रवाई नई होइस। बताए गेहे कि आहिल्या के शादी बरस 2014 म होइस हे। महिला के आरोप हे कि शादी के बाद ले ही ओखर पति अउ ससुराल वाले मन ओला तंग करत हे। महिला ह ससुराल वाले मन उपर दहेज प्रताड़ना के आरोप घलो लगाइस हे।