स्कूल के स्वीपर निभावत हे शिक्षक के जिम्मेदारी

गरियाबंद । जिला म एक स्वीपर शिक्षक के जिम्मेदारी निभावत हे। स्वीपर ह जब स्कूल म शिक्षक मन के कमी ले लइका मन के पढ़ाई बिगड़त देखिस तव दुखी होके खुद लइका मन ल पढ़ाए बर शुरु करिस।
ये मामला देवभोग विकासखंड के दीवानमुडा मिडिल स्कूल के हवय। जिहां के मिडिल स्कूल ह पिछू दू बच्छर ले एक झन शिक्षक के भरोसा संचालित होवत हे। इहां अध्ययनरत 103 लइका मन ल एक शिक्षक संभाल थे। लइका मन ल संभाले म जब शिक्षक ल मुश्किल होइस तव स्वीपर राजूराम यादव ह आगे आके मदद करिस। 12वीं पास स्वीपर राजूराम यादव ह दीवानमुडा मिडिल स्कूल के 103 लइका मन ल पढ़ाए बर शुरु करिस। राजू पिछू कई महीना ले तीनों कक्षा म समाजिक विज्ञान, हिन्दी अउ संस्कृति विषय ल पढ़ात हवय। ओखर पढ़ाए के तरीका ले लइका मन काफी खुश हे। मिडिल स्कूल म पदस्थ शिक्षक घलो उंखर तारीफ करत नइ थकय।